190 ވިލާއާއެކު ހއ. މެދަފުށީގައި 9.3 ބިލިއަން ރުފިޔާގެ ރިސޯޓެއް ހަދަން ނިންމާ އެ މަސައްކަތް ފަށައިފިއެވެ.
މި ރިސޯޓު މެދަފުށީގައި ތަރައްގީ ކުރަނީ ދުބާއީގެ ކުންފުންޏެއް ކަމަށްވާ ސަމަނަ ޑިވަލޮޕާސް އިންނެވެ. މި ކުންފުނީގެ ސީއީއޯ އިމްރާން ފާރޫގް ވަނީ ރާއްޖެ ފަދަ ގައުމެއްގައި ލަގްޒަރީ ރިސޯޓެއް ހެދުމަކީ ލިބޭ ވަރަށް ބޮޑު އުފަލެއް ކަމަށާއި މި ރިސޯޓާއެކު އެ ކުންފުނީގެ ވިޔަފާރި ފުޅާކުރުމަށް މަގުފަހިވެގެންދާނެ ކަމަށް ބުނެފައެވެ.
ހއ. މެދަފުށީގައި ތަރައްގީ ކުރާ މި ރިސޯޓުގައި 190 ވިލާ ހެދުމަށް ހަމަޖެހިފައިވާއިރު އޭގެ ތެރޭގައި ބީޗް ވިލާ އާއި ވޯޓާ ވިލާތަކުގެ އިތުރުން ޕޫލްސައިޑް އެޕާޓްމެންޓް ހިމެނެއެވެ.
2029 ވަނަ އަހަރަށް ނިންމަން ހަމަޖެހިފައިވާ މި ރިސޯޓު ހަދާ އަތޮޅުގައި ހދ. ހިމެނޭހެން މިވަގުތު ހިންގަމުންދަނީ 3 ރިސޯޓެވެ. ހއ. މެދަފުށީގައި ހަދާ މި ރިސޯޓަށް ސީޕްލޭންގައި ދެވެނީ 45 މިނެޓުންނެވެ. އަދި ހަނިމާދޫ އެއާޕޯޓުން 20 މިނެޓުގެ ތެރޭގައި ދެވޭނެއެވެ.
ފަތުރުވެރިކަމުގެ ދާއިރާގައި ފާހަގަކޮށްލެވޭ ކުރިއެރުންތަކެއް ރާއްޖެއިން ހޯދަމުން އަންނައިރު، މި އަހަރުގެ މިހާތަނަށް 132،000 އަށްވުރެ ގިނަ ފަތުރުވެރިން ދިވެހިރާއްޖެ ޒިޔާރާތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ. ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދުތައްވެސް ވަނީ އިތުރުވެފައެވެ. އެގޮތުން ދުވާލެއްގެ މައްޗަށް އެވެރެޖްކޮށް 6000 އަށްވުރެ ގިނަ ފަތުރުވެރިން އަންނައިރު ތިން ދުވަހެއްގައި 8،000 އަށްވުރެ ގިނަ ފަތުރުވެރިން އައިސްފައިވާކަމަށްވެސް ތަފާސް ހިސާބުތަކުން ދައްކައެވެ.
ފަތުރުވެރިކަމަށް މިހާރު ރާއްޖޭގައި ޖުމްލަ 1,156 ތަނެއް ދަނީ ހިންގަމުންނެވެ. އޭގެ ތެރޭގައި 173 ރިސޯޓާއި 816 ގެސްޓްހައުސްގެ އިތުރުން 152 ސަފާރީ އާއި 15 ހޮޓެލް ހިމެނެއެވެ. މިތަންތަނުގައި ފަތުރުވެރިކަމަށް 61,822 އެނދު އޮޕަރޭޓްކުރެއެވެ.
