ބީއެމްއެލް އިސްލާމިކް ބޭންކިންގެ 10 ވަނަ އަހަރީ ދުވަހާ ގުޅުވާ ހާއްސަ ޕްރޮމޯޝަނެއް ފަށައިފިއެވެ.
ބީއެމްއެލް އިން ބުނީ ބީއެމްއެލް އިސްލާމިކް ބޭންކިންގެ 10 ވަނަ އަހަރީ ދުވަހާ ގުޅިގެން ނަސީބުވެރި 10 ފަރާތަކަށް ފުލީ ޕެއިޑް ހައްޖު ދަތުރެއް ލިބިގެން ދާނެ ކަމަށެވެ. ބީއެމްއެލް އިން ބުނީ މި ޕްރޮމޯޝަން ކުރިއަށް ދާނީ މި މަހު 23 އިން ނޮވެމްބަރު 30 ގެ ނިޔަލަށް ކަމަށެވެ.
ބީއެމްއެލް އިން ބުނީ ބީއެމްއެލް އިސްލާމިކްގެ ހިދުމަތް މިހާރު ބޭނުންކުރަމުންދާ ކަސްޓަމަރުންނާއި އަލަށް ހިދުމަތްބޭނުން ކުރަން ފަށާ ކަސްޓަމަރުންގެ ތެރެއިން ފައިނޭންސިން ފެސިލިޓީއެއް ބޭނުންކުރަމުންދާ ކަސްޓަމަރުންނާއ،ި މުސާރަ ޖަމާކުރާ ކަސްޓަމަރުންނަށާއ،ި ޖެނެރަލް އިންވެސްޓްމެންޓް އެކައުންޓް ނުވަތަ އިސްލާމިކް ކްރެޑިޓް ކާޑެއް ބޭނުންކުރާ ކަސްޓަމަރުންނަށްވެސް މި ޕްރޮމޯޝަންގައި ބައިވެރި ވެވޭނެ ކަމަށެވެ.
ފާހަގަކޮށްލެވޭ ގޮތުގައި ބީއެމްއެލް އިން ދަނީ ބީއެމްއެލްގެ ކަސްޓަމަރުންނަށް ގިނަ އަދަދެއްގެ އޮފާތަކަކާއި ޕްރޮމޯޝަންތައް ބާއްވަމުންނެވެ. އެގޮތުން ބީއެމްއެލްގެ ޑެބިޓް އަދި ކްރެޑިޓް ކާޑުން މުއާމަލާތުކޮށްގެން 1 ލައްކަ ރުފިޔާ ހޯދުމުގެ ފުރުސަތު ލިބޭ ހާއްސަ ޕްރޮމޯޝަނެއްވެސް ބީއެމްއެލް އިން ވަނީ މި މަހުގެ 31ގެ ނިޔަލަށް ކުރިއަށް ގެންދަން ނިންމާފައެވެ.
ބީއެމްއެލް އިން ބުނީ މި ޕްރޮމޯޝަންގައި އަގުހުރި އިނާމުތަކެއް ދިނުމަށް ހަމަޖެހިފައިވާކަމަށާއި، އެގޮތުން ކޮންމެ ދުވަހަކުވެސް ލަކީ ޑްރޯއަކުން 5 ނަސީބުވެރި ފަރާތެއް ހޮވާނެ ކަމަށާއި މި 5 ފަރާތަށް 1000ރ. ގެ ގިފްޓް ކާޑެއް ލިބިގެން ދާނެ ކަމަށެވެ.
ޕްރޮމޯޝަންގައި ބައިވެރިވުމަށް ބީއެމްއެލްގެ ޑެބިޓް ނުވަތަ ކްރެޑިޓް ކާޑުން 200ރ އިން މަތިން ޓްރާންސެކްޝަންއެއް ކުރަން ޖެހެއެވެ. ބީއެމްއެލް އިން ބުނީ ނަސީބުވެރި ފަރާތްތަކަށް ހޮވޭ މީހުންގެ މައުލޫމާތު ބީއެމްއެލްގެ ވެބްސައިޓުގައި އާންމުކުރަމުން ދާނެ ކަމަށާއި، މި ފަރާތްތަކަށް ބީއެމްއެލްގެ ނަންބަރު 3330200 އިން ފޯނު ކޯލެއް ވެސް ކުރާނެ ކަމަށެވެ.
