މާލޭ ސަރަހައްދުގައި ފޯރުކޮށްދެވޭ ފެނުގެ ހިދުމަތުގެ ކަށަވަރުކަން އިތުރުކުރުމަށް މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ) އިން ކުރިއަށް ގެންދާ، މާލެ އާއި ހުޅުމާލޭގެ ފެނުގެ ވިޔުގަ ގުޅާލުމުގެ މަޝްރޫއުގެ 65 އިންސައްތަ މަސައްކަތް ނިމިއްޖެއެވެ.
2016 ވަނަ އަހަރު ފަށާފައިވާ، މި މަޝްރޫއުގެ ބައެއް މުހިންމު މަސައްކަތްތައް ތަފާތު އެކި އެކި ސަބަބުތަކާއި ހުރެ ގިނަދުވަސްތަކެއްވަންދެން ހުއްޓިފައި އޮތުމަށްފަހު އަލުން ފަށާފައި ވަނީ މިދިޔަ އަހަރު ކަމަށް އެމްޑަބްލިޔުއެސްސީއިން ބުނެއެވެ.
އެގޮތުން މާލެއާއި ހުޅުމާލެއާ ދެމެދު އަޅާފައިވާ 20 އިންޗި ޑައިމީޓަރު ހުންނަ 5 ކިލޯމީޓަރުގެ ދިގު މައި ހޮޅި ސާފުކޮށް ޑިސްއިންފެކްޓް ކުރުމާއި ޕްރެޝާ ޓެސްޓް ކުރުމުގެ މަސައްކަތް ކުރިއަށް ގެންދަން ފަށާފައިވާކަން އެމްޑަބްލިޔުއެސްސީއިން ފާހަގަކުރެއެވެ.
އެމްޑަބްލިޔުއެސްސީއިން ބުނީ މާލެއާއި ހުޅުމާލޭގައި ގާއިމްކުރެވޭ ޓްރާންސްފާ ޕަމްޕް ސްޓޭޝަންތަކުގެ ފައުންޑޭޝަން މަސައްކަތްތައް ނިންމާ އިމާރާތުގެ އޮނިގަނޑުގެ މަސައްކަތްތައް ފަށާފައިވާ ކަމަށެވެ. އެގޮތުން މާލޭގެ ޕަމްޕް ސްޓޭޝަންގެ މުޅި މަސައްކަތުގެ 25 ޕަސެންޓް މަސައްކަތް ނިމިފައިވާ ކަމަށާއި ހުޅުމާލޭގެ ޕަމްޕް ސްޓޭޝަންގެ 60 ޕަސެންޓް މަސައްކަތް މިހާރު ނިމިފައިވާ ކަމަށް އެމްޑަބްލިޔުއެސްސީއިން ވަނީ ބުނެފައެވެ.
ޕަމްޕްސްޓޭޝަންތަކުގެ އިމާރާތްތަކުގެ މަސައްކަތް މާޗް މަހުގެ ނިޔަލަށް ނިންމުމަށް އަމާޒުކުރެވިފައިވާ ކަމަށް ވެސް އެމްޑަބްލިޔުއެސްސީއިން ބުނެއެވެ. އަދި އިމާރާތްތަކުގެ މަސައްކަތްތައް ނިމުމުން ޕަމްޕްތައް ބަހައްޓާ ނިމުމަށްފަހު 2025 ވަނައަހަރުގެ ދެވަނަ ކުއާޓާގައި މި ނިޒާމްގެ ބޭނުންކުރަން ފެށުމަށް އެމްޑަބްލިޔުއެސްސީއިން ވަނީ އަމާޒު ހިފާފައެވެ.
އެމްޑަބްލިޔުއެސްސީ ބުނީ ހުޅުމާލެ އާއި މާލޭގެ ފެނުގެ ވިއުގަ ގުޅާލުމުގެ މަޝްރޫއު ނިމުމުން މާލެއިން ހުޅުމާލެއަށް ނުވަތަ ހުޅުމާލެއިން މާލެއަށް، ގަޑިއަކު 800 ޓަނުގެ ފެން ޕަންޕުކުރުމުގެ ގާބިލްކަން ލިބިގެންދާނެ ކަމަށެވެ. މީގެ ސަބަބުން މާލެ ސަރަހައްދުގެ ފެނުގެ ހިދުމަތުގެ ކަށަވަރުކަން އިތުރުވެގެން ދާނެ ކަމަށް ވެސް އެ ކުންފުނިން ބުނެއެވެ.
އެމްޑަބްލިޔުއެސްސީ ގެ އަމާޒަކީ މެދުކެނޑުމެއްނެތި ދެމެހެއްޓެނެވި ގޮތެއްގައި ސާފު ބޯފެނާއި ރައްކާތެރި ނަރުދަމާގެ ހިދުމަތް ފޯރުކޮށްދިނުމާއެކު ހިދުމަތުގެ ފެންވަރާއި ކަށަވަރުކަން އިތުރުކުރުމަށް މެދުކެނޑުމެއްނެތި މަސައްކަތް ކުރުންކަން އެ ކުންފުނިން ފާހަގަ ކުރެއެވެ.
