ހައި ކޯޓުގެ ކުރީގެ ފަނޑިޔާރު ޝުއައިބު ހުސައިން ޒަކަރިއްޔާ މިއަދު އަވަހާރަވެއްޖެއެވެ.
ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް މިއަދު ޝުއައިބު އަވަހާރަވީ އިރު އޭނާގެ އުމުރަކީ 55 އަހަރެވެ. އެންމެ ފަހުން އޭނާ ކެންސަރު ބައްޔަށް ފަރުވާ ހޯއްދަވާފައި ވަނީ ހުޅުމާލެ ހޮސްޕިޓަލުންނެވެ.
އޭނާގެ މައްޗަށް ކުރާ ކަށުނަމާދު އޮތީ މާލޭގެ އާސަހަރާ މިސްކިތުގައި މިރޭ 11:00 ގައެވެ.
ހައިކޯޓުގެ ފަނޑިޔާރުކަން ކުރެއްވި، ގދ. ހޯޑެއްދޫއަށް އުފަބް ޝުއައިބު 11 އަހަރު ވަނީ އެ ކޯޓުގައި ހިދުމަތް ކުރައްވާފައެވެ. އޭނާ ހައިކޯޓުގެ ފަނޑިޔާރު ކަމަށް އައްޔަން ކޮށްފައި ވަނީ މާޗު 26، 2011ގަ އެވެ. އަދި އޭނާ އެ މަގާމުން ރިޓަޔާކުރެއްވީ ނޮވެމްބަރު 22، 2022 ގައެވެ.
ޝުއައިބު ފުރުއްވާފައިވާ މަގާމުތަކުގެ ތެރޭގައި ޖަސްޓިސް މިނިސްޓްރީގެ ލީގަލް އޮފިސަރު ކަމާއި ހާއްސަ ގާޒީ ކަމާއި އާއިލާއާ ބެހޭ ކޯޓުގެ ގާޒީ ކަމާއި މަދަނީ ކޯޓާއި ކުޑަކުދިންނާ ބެހޭ ކޯޓުގެ އިސް ގާޒީކަން ހިމެނެއެވެ. ފަނޑިޔާރުންގެ ޖަމިއްޔާގެ ރައީސްކަން ވެސް ޝުއައިބު ކުރެއްވާފައި ވެއެވެ.
އޭނާ ވަނީ މަޖީދިއްޔާ ސްކޫލްގައި ކިޔަވައި ދެއްވުމުގެ އިތުރުން ފެކަލްޓީ އޮފް އިސްލާމިކް ސްޓަޑީސް އާއި ފެކަލްޓީ އޮފް ޝަރީއާ އެންޑް ލޯ ގައި ލެކްޗަރާއެއްގެ ގޮތުގައި ވެސް މަސައްކަތް ކުރައްވާފައެވެ.
