މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ހިޔާނާތުގެ މައްސަލަތަކާ ގުޅިގެން ކުރީގެ ނައިބު ރައީސް އަހުމަދު އަދީބާއެކު ޕްރޮސެކިއުޓާ ޖެނެރަލް އޮފީހުން އެކުލަވާލާފައިވާ އިމިއުނިޓީ އަދި އެއްބާރުލުން ދިނުމުގެ އެއްބަސްވުން ނިމުމަކަށް ނިންމައިފިއެވެ.
ޕީޖީ އިން ބުނީ، އެމްއެމްޕީއާރްސީ ހިޔާނާތުގެ މައްސަލައާ ގުޅިގެން ހަތަރު ފަރާތަކާ އެކު އެކުލަވާލާފައިވާ އިމިއުނިޓީ އަދި އެއްބާރުލުންދިނުމުގެ އެއްބަސްވުން ނިމުމަކަށް ގެނައުމަށް މިއަދު ނިންމާފައިވާ ކަމަށެވެ. އެއީ:
- ހ. ސާމަރާ، އަހްމަދު އަދީބު އަބްދުލްޣަފޫރު
- މ. ލޭންޑް އޮފް ގާޑެން، އަހްމަދު އިޝްފާހް އަލީ
- މ. ސެސްނާ، މުހައްމަދު އައްލާމް ލަތީފް
- ގ. އޮއިވާލި، މުހައްމަދު ހުސައިން
މީ ހަތަރު މީހުންގެ އެއްބަސްވުން އުވާލަން ނިންމާފައިވާ އިރު، ހ. އާހަމަ، އަބްދުالله ޒިޔާތާ އެކު ވެފައިވާ އެއްބަސްވުން ވަނީ 2022 ވަނަ އަހަރުގެ އޮގަސްޓު މަހުގެ ތެރޭގައި ނިމުމަކަށް ގެނެސްފައެވެ.
ޕީޖީ އިން ބުނީ، މި އެއްބަސްވުންތައް ނިމުމަކަށް ގެނައުމަށް ނިންމީ މި އެއްބަސްވުންތައް އެކުލަވާލާފައި ވަނީ އެމްއެމްޕީއާރްސީގެ ހިޔާނާތުގެ މައްސަލައިގެ ތަހުގީގު ކުރިއަށް ގެންދިއުމަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތަށް އެއްބާރުލުން ހޯދުމުގެ ބޭނުމުގައި ކަމަށެވެ. ނަމަވެސް މި މީހުންގެ ފަރާތުން މައްސަލައިގެ ތަހުގީގަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމަށް އެކަށީގެންވާ އެއްބާރުލުން ލިބެމުން ނުދާކަމަށް ތަހުގީގީ އިދާރާތުން މައުލޫމާތު ދީފައިވާ ކަމަށެވެ.
މި އެއްބަސްވުންތައް ނިމުމަކަށް ގެނައުމާއެކު، މި އެއްބަސްވުންތަކުގެ ސަބަބުން ކުރިއަށް ނުގެންދެވި ހުރި، މި މީހުންގެ މައްޗަށް ތުހުމަތު ކުރެވޭ މައްސަލަތަކުގެ ތަހުގީގު ކުރިއަށް ގެންގޮސް، ވީ އެންމެ އަވަހަކަށް މައްސަލަ ހުށަހެޅުމަށް ފުލުހުންނަށާއި އެންޓި-ކޮރަޕްޝަން ކޮމިޝަނަށް އަންގާފައި ވާނެ ކަމަށް ޕީޖީން ބުނެއެވެ.
އަދީބުގެ މައްޗަށް 20 އަހަރުގެ ޖަލު ހުކުމެއް އިއްވާ ދެ މިލިއަން ރުފިޔާ އިން ޖޫރިމަނާ ކުރީ ދައުލަތާ އެކު އިއުތިރާފް އެއްބަސްވުމެއް ހެދުމަށްފަހުއެވެ. އެ އެބަސްވުމުގެ ދަށުން އޭނާ ވަނީ 7 ދައުވާއަކަށް އެއްބަސްވެފައެވެ. އެ އެއްބަސްވުމުގައި ދައުލަތުން ވަނީ އަދީބަށް އަދަބު ލުއިކޮށްދީފައެވެ. އަދި އަދީބުގެ ސިއްހީ ހާލަތު ތަންނުދޭތީ ކަމަށް ބުނެ އޭނާ ވަނީ ގޭ ބަންދަށް ދޫކޮށްލާފައެވެ.
