މާލެ ސަރަހައްދުގެ ވައިގެ ކޮލިޓީ ނުރައްކާތެރި މިންވަރަކަށް ނުސާފުވެފައިވާ ކަމަށް ހޯދުން ތަކުން ދައްކައިފިއެވެ.
"ދަ ޕްރެސް" އަށް މައުލޫމާތު ދެއްވަމުން ހެލްތް ޕްރޮޓެކްޝަން އެޖެންސީގެ މީޑިއާ އޮފިޝަލް ވިދާޅުވީ، މާލެ ސަރަހައްދުގެ ވައިގެ ކޮލިޓީ ސިއްހަތަށް ނުރައްކާ މިންވަރަށް ނުސާފުވެފައިވާ ކަމަށެވެ.
ވިލިމާލޭގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުން، މި ސަރަހައްދުގެ ވައިގެ ކޮލިޓީ މި ވަގުތު ހުރީ 156 ގައެވެ. އެއީ ސިއްހަތަށް ވަރަށް ނުރައްކާތެރި މިންވަރެއް ކަމަށް އެޗްޕީއޭއީން ބުނެއެވެ. މި ހާލަތުގައި ރައްކާތެރިކަން ކަށަވަރުކުރަން ކުރަންވީ ބައެއް ކަންކަން އެޗްޕީއޭއިން ވަނީ ބުނެދީފައެވެ:
- ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަ ވަގުތު ހޭދަނުކުރުން.
- ތުއްތު ކުދިން ބޭރަށް ނުނެރުން.
- ގޭގެ ދޮރުތައް ލައްޕާފައި ބެހެއްޓުން.
- ބޭރަށް ނުކުންނަން ޖެހޭ ހާލަތްތަކުގައި ރައްކާތެރި މާސްކެއް އެޅުން.
- ފުއްޕާމޭގެ ބަލިތަކާއި ހިތުގެ ބަލި އަދި އެލާޖީގެ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަނުކުރުން.
- ބޭރުގައި ކުޅިވަރު ކުޅުމާއި ކަސްރަތުކުރުން ކަހަލަ ކަންތައްތައް މަޑުޖައްސާލުން.
ހުސްވި ޑިސެމްބަރު މަހުވެސް ރާއްޖެއަށް ވަނީ ވަރަށް ބޮޑަށް ވައި ނުސާފުވެފައެވެ. އިންޑިއާގެ ބޭ އޮފް ބެންގަލްގައި އުފެދިފައިވާ ކޮޅިގަނޑާ އެއްކޮށް ރާއްޖޭގެ ވައި ނުސާފުވެފައިވާއިރު، ވައި ނުފާސުވާ ވަގުތުތަކުގައި ރައްކާތެރިކަމުގެ ފިޔަވަޅު އެޅުމަށް އޭރުވެސް އިލްތިމާސް ކޮށްފައި ވެއެވެ.
މިހާރު އާންމުކޮށް ކޮންމެ އަހަރަކު ވެސް، އިރުވައި މޫސުމުގައި ރާއްޖޭގެ ޖައްވު ނުސާފުވުމަކީ ފާހަގަކޮށްލެވޭ ކަމެކެވެ. ރާއްޖޭގެ ޖައްވު ނުސާފުވަމުންދަނީ އުތުރު އިންޑިއާގެ ސަރަހައްދުތަކުގައި އަންނަ ނުސާފު ވައިގެ ސަބަބުންނެވެ.
