އިންފޮމޭޝަން ކޮމިޝަނަރުގެ އޮފީހުން ނިންމާ ނިންމުންތަކާ ގުޅޭ އެންމެ ފަހުގެ މަރުހަލާއަކީ ހައި ކޯޓު ކަމަށް ސުޕްރީމް ކޯޓުގެ ފަނޑިޔާރު، މަހާޒު އަލީ ޒާހިރު ވިދާޅުވެއްޖެ އެވެ.
2022 ވަނަ އަހަރު އެކްޓިވިސްޓް އަހުމަދު އަފްރާހު އިސްމާއިލް ވަނީ އަމީނީ މަގު ހެދުމުގެ މަޝްރޫއުއާ ގުޅޭގޮތުން މައުލޫމާތު ހޯދުމަށް ހައުސިން މިނިސްޓްރީއަށް ހުށަހަޅާފައެވެ. ނަމަވެސް އެ އާރުޓިއައިއަށް ގާނޫނުގައި ބުނާ މުއްދަތުގައި އެ މިނިސްޓްރީން ޖަވާބު ދީފައި ނުވާއ މައްސަލަ އިންފޮމޭޝަން ކޮމިޝަނަރުގެ އޮފީހަށް ހުށަހެޅުމުން، އެ މައުލޫމާތު ދޭން އެ މިނިސްޓްރީގެ މައްޗަށް ވަނީ އަމުރު ކޮށްފައެވެ.
ކޮމިޝަނަރުގެ އެ ނިންމުން މިނިސްޓްރީގެ ފަރާތުން ހައި ކޯޓުގައި އިސްތިއުނާފް ކުރުމުން އެ ކޯޓުން ވެސް ނިންމީ އަފްރާހު އެދުނު މައުލޫމާތު ދޭން ޖެހޭނެ ކަމަށެވެ. އެހެން ކަމުން ދައުލަތުން އެ މައްސަލަ ސުޕްރީމް ކޯޓުގައި ވަނީ އިސްތިއުނާފް ކޮށްފައެވެ.
މިއަދު އެ މައްސަލައިގެ ހުކުމް އިއްވަމުން ފަނޑިޔާރު މަހާޒު ވިދާޅުވީ މިއީ މައުލޫމާތު ހޯދައި ލިބިގަތުމުގެ ގާނޫނުގެ 64 ވަނަ މާއްދާގެ (ށ) އޮތްގޮތުން، މިއީ ސުޕްރީމް ކޯޓަށް ބެލިދާނެ މައްސަލައެއް ކަމަށް ގަބޫލު ނުކުރައްވާ ކަމަށެވެ.
ގާނޫނުގެ މި އަކުރަށް ބަލާއިރު، މި އަކުރުގައި ޝަރުއީ ކޯޓުތަކުގެ ބަދަލުގައި ލިޔެފައިވަނީ މުފްރަދުކޮށް، "ޝަރުއީ ކޯޓަކުން" މި ގޮތަށް. އަދި 'މި މާއްދާގެ ދަށުން ކުރާ އިލްތިމާސްގެ މަރުހަލާގައި އެކަންޏެވެ.' ބަޔާންކޮށް، އިސްތިއުނާފީ އެހެން މަރުހަލާތައް އެވަނީ ސާފު އިބާރާތުން އިސްތިސްނާ ކޮށްފައި. މީގެ އިތުރަށް މި މާއްދާގެ (ހ) ގައި ހައިކޯޓުގެ އިތުރުން، ސުޕްރީމް ކޯޓުގެ ވާހަކަ ބަޔާންކޮށްފައި ނުވެ،" ފަނޑިޔާރު މަހާޒު ވިދާޅުވިއެވެ.
ކޯޓުތަކުން ނިންމާ އެހެން ބައެއް ނިންމުންތަކަކީ މިހާރު ވެސް އިސްތިއުނާފު ކުރުމުގެ ފުރުސަތު ނެތް ނިންމުންތަކެއް ކަން ފާހަގަ ކުރައްވާ މަހާޒު ވިދާޅުވީ، އޭގެ އެއް މިސާލަކީ އިންތިހާބުތަކާބެހޭ އާންމު ގާނޫނުގެ ދަށުން ފުރަތަމަ މަރުހަލާގައި ހައި ކޯޓުން ބަލަން ޖެހޭ މައްސަލަތަކުގެ އިތުރުން މަސްތުވާތަކެއްޗާބެހޭ ގާނޫނުގެ 80 ވަނަ މާއްދާގައި ބަޔާންކޮށްފައިވާ ޑްރަގް ކޯޓުގެ ނިންމުންތަކެއް ކަމަށެވެ.
އެހެންކަމުން އުސޫލުން، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އިންފޮމޭޝަން ކޮމިޝަނަރު ނިންމާ ނިންމުމަކާ މެދު ހިތްހަމަނުޖެހިގެން ހައިކޯޓުން ބަލައި ގޮތެއް ކަނޑައަޅާ މައްސަލަތަކަކީ އެ ކޯޓުން ގޮތެއް ކަނޑައެޅުމުން އިސްތިއުނާފީ މަރުހަލާ ނިމިގެންދާނެ މައްސަލަތަކެއް ކަމަށް މަހާޒު ވަނީ ވިދާޅުވެފައެވެ.
ނަމަވެސް އެ މައްސަލަ ބެއްލެވި އެހެން ފަނޑިޔާރުން ކަމަށްވާ ފަނޑިޔާރު އައިޝާ ޝުޖޫން އަދި ފަނޑިޔާރު ޑރ. އަޒްމިރަލްދާ ޒާހިރުގެ ރައުޔުގައި ވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އެ މައްސަލަ ސުޕްރީމް ކޯޓަށް ބެލޭނެތޯ ކަނޑައަޅަން ޖެހޭ ހާލަތެއް މި މައްސަލައިގެ ތެރޭގައި ނެތް ކަމަށް ވިދާޅުވެފައެވެ.
