އޮޕަރޭޝަން ކުރަނގީގެ ދަށުން މިހާތަނަށް 25،000 ބިދޭސީންގެ މައުލޫމާތު އެއްކޮށްފައިވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.
ވެހިރާއްޖޭގައި އުޅެމުންދާ ބިދޭސީންގެ މައުލޫމާތު އެއްކުރުމަށް ފަށާފައިވާ "އޮޕަރޭޝަން ކުރަނގި"ގެ ބޮޑު ހަރަކާތެއް އިއްޔެ ވަނީ ފަށާފައެވެ. ގްރޭޓާ މާލޭ ސަރަހައްދުގައި ކުރިއަށް ގެންދިޔަ މި އޮޕަރޭޝަންގައި ހޯމް މިނިސްޓްރީގެ 75 އޮފިޝަލުން ވަނީ ބައިވެރިވެފައެވެ.
މި ހަރަކާތާއި ގުޅިގެން އިހުސާން ވިދާޅުވީ މިއީ މާލެ ސަރަހައްދުގައި އަމިއްލަ ތަންތަނުގައި މަސައްކަތް ކުރާ މީހުންނާއި އާންމު ތަންތަނަށް އަމާޒުކޮށްގެން ފުޅާ ދާއިރާއެއްގައި ހިންގި ފުރަތަމަ ހަރަކާތް ކަމަށާއި، މިދިޔަ ނުވަ މަސް ތެރޭ 25،483 ބިދޭސީންގެ މައުލޫމާތު އެއްކުރެވިފައިވާކަމަށެވެ.
އެ ހަރަކާތާ ގުޅޭ ބައެއް ތަފާސްހިސާބުތައް ހިއްސާކުރައްވަމުން އިހުސާން ވިދާޅުވީ އިއްޔެ ކުރެވުނު މަސައްކަތުން 1،455 ބިދޭސީ މަސައްކަތްތެރިންގެ 10 އިނގިލީގެ ނިޝާން އަދި ފޭޝަލް ރިކޮގްނިޝަންއަށް ބޭނުންވާ ފޮޓޯ ނެގިކަމަށާއި، އަދި ޑޭޓާބޭސް އެއްކުރެވުނު ކަމަށެވެ.
އިހުސާން ވަނީ މިދިޔަ އަހަރުގެ ނޮވެމްބަރު 24 އާ ހަމައަށް 10،000 ބިދޭސީންގެ މައުލޫމާތު އެއްކޮށްފައިވާ ކަމަށާއި، އޭގެ ފަހުން، މިދިޔަ ދެ މަސްދުވަސް ތެރޭ 15،000 އަށް ވުރެ ގިނަ ބިދޭސީންގެ މައުލޫމާތު އެއްކުރިކަމަށް ވިދާޅުވެފައެވެ.
އިހުސާން އިތުރަށް ވިދާޅުވީ ސަރުކާރުގެ އަމާޒަކީ ބިދޭސީންގެ މައްސަލަ ތިން އަހަރު ދުވަހުގެ ތެރޭގައި ހައްލުކުރުން ކަމަށާއި މި އަމާޒަށް 2027 ވަނަ އަހަރު އޭޕްރީލް މަހު ވާސިލުވެވޭނެ ކަމަށެވެ.
އިހުސާން ވަނީ މި މަސައްކަތުގައި އިމިގްރޭޝަނާއި، ފުލުހުންގެ އިތުރުން ކައުންސިލްތަކުން ކުރައްވާ މަސައްކަތް ފާހަގަކުރައްވާ ޝުކުރު އަދާކުރައްވާފައެވެ.
