އިގްތިސޯދީ ނަފާ ހޯދުމަށް ކައުންސިލްތަކަށް 25 އަހަރަށް ފަޅުރަށް ކުއްޔަށް ދޫކުރަން ސަރުކާރުން އެކުލަވައިލި އުސޫލުގެ ދަށުން ޕްރޮޕޯސަލް ހުށަހެޅި ކައުންސިލްތަކަށް ފަޅު ރަށް ދިނުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.
ރައީސް މުއިއްޒު މިފަދައިން ނިންމަވާފައިވާކަން ހާމަކުރެއްވީ ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައެވެ.
އާދަމް ޝަރީފް ވިދާޅުވީ ޕްރޮޕޯސަލް ހުށަހެޅި 3 ކައުންސިލަށް ވެސް ފަޅު ރަށް ދޫކުރުމަށް ނިންމާފައިވާ ކަމަށެވެ. އެގޮތުން ކައުންސިލްތަކަށް ފަޅު ރަށްތައް ހަވާލުކުރުމުގެ މަސައްކަތް ފިނޭންސް މިނިސްޓްރީ އަދި މިނިސްޓްރީ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް ގުޅިގެން ކުރިއަށް ގެންދާނެ ކަމަށް އާދަމް ޝަރީފް ވިދާޅުވިއެވެ.
ކައުންސިލްތަކަށް ދިނުމަށް ހަމަޖެހިފައިވާ ފަޅު ރަށްތައް:
- ރ. އިނގުރައިދޫ ކައުންސިލް - ރ. ނެޔޮ
- ދ. އަތޮޅު ކައުންސިލް - ދ. މިނިމަސްގަލި އަދި ފެންފުށި
- ލ. މާވަށު ކައުންސިލް - ލ. ބޮޑުމާބުޅަލި
އިގްތިސޯދީ ނަފާ ހޯދުމަށް ފަޅު ރަށްތައް ކުއްޔަށް ދޫކުރަން ނިންމާފައިވާކަން ރައީސް މުއިއްޒު އިއުލާނު ކުރައްވާފައި ވަނީ މިދިޔަ މާޗް ތިން ވަނަ ދުވަހުގެ ރޭ ރ. މީދޫގައި ވާހަކަ ދައްކަވަމުންނެވެ. ރަށްރަށުގެ އިގްތިސޯދީ ތަރައްގީއަށްޓަކައި ހުރިހާ ކައުންސިލަކަށް، އެރަށަކާ ކައިރިން ނޫނަސް ފަޅުރަށް ކުއްޔަށް ލިބޭނެ ކަމަށް ރައީސް ވިދާޅުވި އެވެ.
ރައީސް ވިދާޅުވީ، 25 އަހަރަކީ ކައުންސިލްތަކުން އިންވެސްޓް ކުރަން އެކަށޭނެ މުއްދަތެއް ކަމަށެވެ. އަދި، ގާނޫނު އޮތް ގޮތަށް ބަލައި، އެ މުއްދަތު 50 އަހަރަށް ވެސް ދިގު ކުރެވިދާނެ ކަމަށް ވެސް ވިދާޅުވި އެވެ. މީގެ އިތުރުން، ކައުންސިލްތަކަށް އެ ރަށަކުން ނަގާ ޓެކުހުގެ 10 ޕަސަންޓު ލިބޭނެ ނިޒާމެއްވެސް ރައީސް ވަނީ އިއުލާން ކުރައްވާފައެވެ.
