ރީޖަނަލް އެއާޕޯޓްސް ކޮމްޕްނީ ލިމިޓެޑް (އާރްއޭސީއެލް) އިން ހިންގާ ޑޮމެސްޓިކް އެއާޕޯޓްތަކުގައި ފާއިތުވި އަހަރު ދުވަހުގެ ތެރޭގައި 8،730 ފްލައިޓް މޫވްމެންޓާއެކު 336،850 ފަސެންޖަރުންނަށް ހިދުމަތް ފޯރުކޮށްދީފައިވާ ކަމަށް އެ ކުންފުނިން ބުނެފިއެވެ.
އާރްއޭސީއެލް އިން މިހެން ބުނެފައި ވަނީ އެ ކުންފުންޏަށް ހަތަރު އަހަރު ފުރުން ފާހަގަކުރުމުގައި އެ ކުންފުނިން ކޮށްފައިވާ މަސައްކަތުގެ ތަފްސީލް ހާމަކުރަމުންނެވެ.
އެ ކުންފުނީގެ އަހަރީ ދުވަސް ފާހަގަކުރުމުގެ ގޮތުން، ކުންފުނީގެ ހެޑް އޮފީހާއި ރީޖަނަލް އެއާޕޯޓްސްތަކުގައި ވަނީ އެކި ހަރަކާތްތައް ހިންގާފައެވެ. އެގޮތުން މިއަދު އެކުންފުނީގައި ބޭއްވި ކުޑަ ހަފުލާއެއްގައި، އެ ކުންފުނީގެ މެނޭޖިން ޑިރެކްޓަރު އަހްމަދު މުބީން ވަނީ ކުންފުނީގެ އެންމެހާ މުވައްޒަފުންނަށާއި ފާއިތުވެ ދިޔަ ހަތަރު އަހަރު ދުވަހު އެ ކުންފުނީގެ އެއާޕޯޓްތަކުން ހިދުމަތް ހޯދި އެންމެހާ ފަސިންޖަރުންނަށް ދުވަހުގެ ހެޔޮ އެދުމާއި ތަހުނިޔާ އަރިސްކޮށްފައެވެ.
މިދިޔަ ހަތަރު އަހަރަކީ އެ ކުންފުނީގެ ހީވާގި މުވައްޒަފުންގެ ވަރަށް ބުރަ މަސައްކަތާއެކު، ކުންފުނިން ފޯރުކޮށްދޭ ހިދުމަތްތައް ރަނގަޅަށް ފޯރުކޮށްދެވިފައިވާ އަހަރެއް ކަމުގައި އެމްޑީ ފާހަގަ ކުރެއްވިއެވެ. ހަމައެއާއެކު އާރްއޭސީއެލް އަކީ ވަކި އުސޫލުތަކެއްގެ މަތިން، ވަކި ގޮތަކަށް ކުރަންޖެހޭ ވަރަށް މުހިއްމު، ބުރަ މަސައްކަތްތަކެއް ކުރާ ތަނެއް ކަމަށާއި ކުންފުނިޣެ މުވައްޒަފުންގެ ދައުރު ފާހަގަ ކުރައްވާ މުބީން ހާއްސަ ޝުކުރެއް މުވައްޒަފުންނަށް އަދާ ކުރެއްވިއެވެ.
އެގޮތުން މިދިޔަ އަހަރަކީ ވަރަށް އުންމީދީ އަހަރެއްގެ ގޮތުގައި ފާހަގަކޮށް އާރްއޭސީއެލުން ވަނީ 8 އެއާޕޯޓްގެ ޖުމްލަ ފްލައިތް މޫވްމަންޓް ހިއްސާކޮށްފައެވެ. މިދިޔަ އަހަރު ތެރޭ ޖުމްލަ 8،730 ފްލައިޓް މޫވްމެންޓް ރެކޯޑް ކުރެވިފައިވާ އިރު، ޖުމްލަ 336،850 ފަސެންޖަރުންނަށް އެއާޕޯޓްތަކުން ވަނީ ހިދުމަތް ފޯރުކޮށްދީފައެވެ.
އާރްއޭސީއެލް އަކީ ޖެނުއަރީ 11، 2021 ގައި ރައީސުލްޖުމްހޫރިއްޔާގެ ގަރާރަކުން އުފައްދާފައިވާ 100 ޕަސެންޓް ސަރުކާރު ހިއްސާވާ ކުންފުންޏެކެވެ. މި ކުންފުނި އުފައްދުމުގެ މައިގަނޑުއެއް މަގްސަދަކީ ސަރުކާރުން ހިންގާ އެއާޕޯޓުތަކުން ރައްޔިތުންނަށް ދޭ ހިދުމަތްތަކުގެ ފެންވަރު ރަނގަޅު ކުރުމާއި، އެއާޕޯޓުތަށް ހިންގުމުގައި ސަރުކާރުގެ ބަޖެޓަށް ބަރޯސާވާ މިންވަރު ދަށްކުރުމެވެ. މީގެއިތުރުން، ސަރުކާރުން ތަރައްގީ ކުރާ އެންމެހާ އެއާޕޯޓްތައް ހިންގައި ބެލެހެއްޓުމާއި، އިތުރަށް ތަރައްގީ ކުރުމަށެވެ.
އާރްއޭސީއެލް އަށް ހަތަރު އަހަރު ފުރިފައިވާ އިރު އެ ކުންފުނީގެ ދަށުން މިހާރު ރާއްޖޭގައި އަންނަނީ އަށް ޑޮމެސްޓިކް އެއާޕޯޓް ހިންގަމުންނެވެ. އެގޮތުން މިހާރު އޮޕަރޭޓް ކުރަމުން އަންނަ އެއާޕޯޓްތަކުގެ ތެރޭގައި ހޯރަފުށި އެއާޕޯޓް، ހަނިމާދޫ އިންޓަނޭޝަނަލް އެއާޕޯޓް، ކުޅުދުއްފުށި އެއާޕޯޓް، ފުނަދޫ އެއާޕޯޓް، މާވަރުލު އެއާޕޯޓް، ފަރެސްމާތޮޑާ އެއާޕޯޓް، ފުވައްމުލަކު އެއާޕޯޓް އަދި ކައްދޫ އެއާޕޯޓް ހިމެނެއެވެ.
