ރ. މީދޫ އާއި އެ އަތޮޅު އަލިފުށީގައި ސިހުރު ހަދާކަމުގެ ތުހުމަތުގައި، ފުލުހުން ކުރިއަށް ގެންދާ އޮޕަރޭޝަނުގައި މިހާތަނަށް 12 ގެއެއް ބަލާ ފާސްކޮށްފިއެވެ.
ފުލުހުން އިއްޔެ ހަވީރު އެ ދެ ރަށުގެ ގެތައް ފާސްކުރަން ފެށީ ސިހުރު ހަދާ ކަމަށް ރިޕޯޓު ކުރުމާއި ގުޅިގެންނެވެ.
ފުލުހުން ބުނީ މިހާތަނަށް މީދޫ އިން 7 ގެ ބަލާފައިވާ ކަމަށެވެ. އަދި އަލިފުށިން 5 ގެއެއް ބަލާފައިވާކަމަށް ފުލުހުން ވަނީ ބުނެފައެވެ.
ފާސްކުރި ގެތަކުން މީހަކު ހައްޔަރުކުރިކަމެއް އަދި އެ ގެތަކުން ސިހުރު ހެދުމަށް ބޭނުންކުރާ ސާމާނު ފެނުނު ކަމެއް ނުވަތަ ނޫން ކަމެއް ވެސް ފުލުހުން ހާމަކޮށްފައި ނުވާއިރު، މި އޮޕަރޭޝަނާއި ބެހޭ މާ ބޮޑު ތަފްސީލެއްވެސް ފުލުހުން ހާމަކޮށްފައެއް ނުވެއެވެ.
ރާއްޖޭގެ އެކި ހިސާބުތަކުގެ ރަށްތަކުގައި ސިހުރު ހަދާ މައްސަލަތައް ދޭތެރެ ދޭތެރެއިން ފެންމަތިވަމުން އަންނައިރު ދާދި ފަހުން އައްޑޫ ސިޓީ މަރަދޫފޭދޫގައިވެސް ވަނީ މި ފަދަ މައްސަލައެއް ފެންމަތިވެފައެވެ.
