ފައިސާ ދިނުމަށް އެދި މަންމައަށް ބިރުދައްކައި އިންޒާރުދިން މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ މާލެއަށް ނިސްބަތްވާ އުމުރުން 24 އަހަރުގެ ފިރިހެނެކެވެ.
އޭނާގެ ބަންދާމެދު ގޮތެއް ނިންމުމަށް ކްރިމިނަލްކޯޓަށް ހާޒިރުކުރުމުން ކޯޓުން ވަނީ އޭނާ 15 ދުވަހަށް ބަންދުގައި ބެހެއްޓުމަށް ހުކުމްކޮށްފައެވެ.
ކްރިމިނަލްކޯޓުގެ ހުކުމުގައި ފާހަގަކޮށްފައިވާ ގޮތުގައި އޭނާގެ މައްޗަށް ތުހުމަތުކުރެވެނީ އޭނާގެ މަންމައަށް ބިރުދައްކައި އިންޒާރު ދިނުމަށްފަހު، ގޭގެ މުދަލަށް ގެއްލުންދިން ކަމަށެވެ.
އޭނާގެ މައްޗަށް ތުހުމަތުކުރެވޭ ކުށްކުރިކަމަށް ތުހުމަތުކުރެވޭ މިންވަރަށް ހެކި ގަރީނާ ހުށަހަޅާފައިވާކަން ކޯޓު އަމުރުގައި ފާހަގަކޮށްފައިވެއެވެ. އެގޮތުން މައްސަލަ ހުށަހަޅާ ފަރާތުގެ ބަޔާން އަދި ސީނަށްދިޔަ ފުލުހުންގެ ބަޔާން ހުށަހަޅާފައިވާކަން ކޯޓު އަމުރުގައި ވަނީ ފާހަގަކޮށްފައެވެ.
މުޖުތަމައުގެ ސަލާމަތާއި ރައްކާތެރިކަމަށްޓަކައި އޭނާ ބަންދުގައި ބަހައްޓަންޖެހޭ ކަމަށް ކަނޑައަޅާފައި ވާއިރު، އޭނާއަކީ ބިރުދެއްކުމާއި މާރާމާރީ ހިންގުމުގެ ހައްޔަރު ނުވަތަ ބަންދު ރެކޯޑް އޮތް ފަރާތެއް ކަމަށާއި ކުށުގައި އަނިޔާވެރިކަން ހިމެނޭ ކަމާއި އަދި ތަކުރާރުކޮށް ފައިސާއަށް އެދުމުން ފައިސާ ނުދިނުމުން މުދަލަށް ގެއްލުންދީ ބިރުދައްކާކަމަށް ބެލެވޭ ކަމަށް ކޯޓު އަމުރުގައިބުނެފައިވެއެވެ.
