މާލެ ސިޓީ ކައުންސިލުން މާފަންނު ސަހަރާ ކޮނެފައިވަނީ ޒިންމާދާރުކަން ކުޑަކޮށްކަމަށާއި މި މަސައްކަތް ކުރި އިރު ފެންހިންދަން ބޭނުންކުރާ ޕަންޕުގެ ބައެއް ވަނީ ނަގާފައިކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި މުއްތަލިބު ވިދާޅުވީ މާފަންނު ސަހަރާ ކޮނުމުގެ މަސައްކަތް ކުރިއިރު މާލޭ ހުޅަނގު އުތުރު ސަރަހައްދުތަކުން ފެން ހިންދަން ބޭނުންކުރާ ސްޓޯމް ވޯޓާ ޕަމްޕުގެ ބައެއް ސިޓީ ކައުންސިލުން ނަގާފައިވާ ކަމަށާއި އަދި މި ކަން މިނިސްޓްރީއަށް އަންގާފައި ނުވާކަމަށެވެ.
މުއްތަލިބު ވިދާޅުވީ މިކަމުގެ ސަބަބުން އެ ސަރަހައްދުގައި ބޮޑަށް ފެންބޮޑުވާ ކަމަށާއި، މައްސަލަ ހައްލުކޮށް ސްޓޯމް ވޯޓާ ޕަމްޕުތައް ބޭނުންކުރެވޭ ގޮތް ހެދުމުގެ މަސައްކަތް ކުރަމުންދާކަމަށެވެ.
ރޭ މާލެ އަށް ކުރި ވިއްސާރައިގައިވެސް މާލޭގައި ވަނީ ފެންބޮޑުވެފައެވެ. އެމްއެންޑީއެފް އިން ބުނީ މާލޭގެ 7 ސަރަހައްދެއްގައި 17 ޕަންޕު ބަހައްޓައިގެން މިހާތަނަށް 18،201 ޓަނުގެ ފެން ހިންދާފައިވާކަމަށެވެ.
އަދި ފެންބޮޑުވުމާ ގުޅިގެން މިހާތަނަށް 104 ގެއަކަށް އެހީތެރިކަން ފޯރުކޮށްދީ 528 ވެލި ބަސްތާ ޖަހައިދީފައިވާކަމަށްވެސް އެމްއެންޑީއެފް އިން ވަނީ ބުނެފައެވެ.
