ސަރުކާރުން ދިވެހި ކުންފުނިތައް މެދުވެރިކޮށް ހިންގާފައިވާ މަޝްރޫއުތަކަށް ނުދީ ހުރި ފައިސާ ރޯދައިގެން ކުރިން ދައްކާ ހަލާސް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ އެމަނިކުފާނު ހުވަދުއަތޮޅަށް މިއަދު ފެެއްޓެވި ދަތުރުފުޅުގެތެރެއިން ގދ.ހޯނޑެއްދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
ރައީސް ވިދާޅުވީ ސަރުކާރުން މަސައްކަތް ކުރަނީ ރާއްޖެ ދަރަނިވިޔަ ނުދީ، ފައިސާ ޗާޕުނުކޮށް، ރައްޔިތުންނަށް ދޭން ޖެހޭ ފައިސާ ދެމުން، ބޭރު ގައުމުތަކަށް ދައްކަން ޖެހޭ ފައިސާ ދައްކަމުން އަދި ފައިސާގެ އަގު ހިފަހައްޓައިގެން ތަރައްގީގެ މަޝްރޫއުތައް ކުރިއަށް ގެންދަން ކަމަށެވެ.
އެގޮތުން ފެނަކަ، އާރްޑީސީ އެމްޓީސީސީ އަދި ވެމްކޯ ފަދަ ކުންފުނިތަކުން، އަމިއްލަ ކުންފުނިތައް މެދުވެރިކޮށް މަސައްކަތްކުރުވާފަ ބޮޑެތި އަދަދުތަކުން ފައިސާ ނުދައްކާ ހުރިކަމަށާއި އެ ހުރިހާ ހުރިހާ ފައިސާއެއް ރޯދައިގެ ކުރިން ދައްކާ ހަލާސްކުރުމަށް މަސައްކަތްކުރައްވަމުންދާކަމަށް ވެސް އެމަނިކުފާނު ވަނީ ވިދާޅުވެފައެވެ.
އަދި ހަމައެހެންމެ އަންނަ ހަފްތާ ތެރޭގައި ވެސް ސަރުކާރުން ކޮށްފައިވާ މަސައްކަތްތަކަށް ފިނޭންސް މިނިސްޓްރީން 500 މިލިއަނަށް ވުރެ ގިނަ ރުފިޔާ ދިވެހި ކުންފުނިތަކަށް ދޫކުރައްވާނެ ކަމަށް ރައީސް ވިދާޅުވިއެވެ.
މިސަރުކާރުން ވެރިކަމާ ހަވާލުވިއިރު ދަޢުލަތުގެ ދަރަނި 200 ބިލިއަން ރުފިޔާއަށް އަރައެވެ. 2022 ވަނަ އަހަރު ނިމުނުއިރު ކުންފުނިތަކުގެ ދަރަނި 32 ބިލިއަން ރުފިޔާގައި އޮތްއިރު އަދި ކުރީ ސަރުކާރުގެ 5 އަހަރުގެ ދައުރުގައި ކުންފުނިތަކުގެ ޖުމްލަ ދަރަނި އެކަނިވެސް 98 ބިލިއަނަށް އަރައެވެ.
