އަލަށް ހައްޖަށް ދާ މީހުންނަށް އިސްކަންދޭ ގޮތަށް، ރާއްޖެއިން ހައްޖަށް މީހުންގެ ގެންދިއުމާ ބެހޭ އުސޫލަށް ބަދަލު ގެންނަން ރައީސް ޑރ. މުހައްމަދު މުއިއްޒު މިއަދު ނިންމަވައިފިއެވެ.
ރައީސް އޮފީހުން ބުނީ، ހައްޖަށް ގެންދިއުމާ ބެހޭ އުސޫލަށް ބަދަލު ގެންނަން ރައީސް ނިންމެވީ، ހައްޖު ކޯޕަރޭޝަނަށް ފައިސާ ދެއްކުމަށް ފަހު ހައްޖުގެ އަޅުކަން އަދާކުރުމަށް ދިގު އިންތިޒާރެއްގައި ތިބި މީހުންގެ މައްސަލައަށް ހައްލު ހޯދައިދިނުމުގެ ގޮތުން އިސްލާމިކް މިނިސްޓްރީން ހުށަހެޅި ކަރުދާހަށް މަޝްވަރާކުރުމަށް ފަހު ވަޒީރުންގެ މަޖިލީހުގެ ލަފަޔާ އެކު ކަމަށެވެ.
އެގޮތުން އަލަށް ހައްޖަށް ދާ މީހުންނަށް އިސްކަންދިނުމަށާއި، ހައްޖުގެ އަޅުކަން އަދާކޮށްފައިނުވާ މީހުންގެ ތެރެއިން 65 އަހަރުން މަތީގެ މީހުންނަށް ހައްޖު ކޯޓާ އިން ވަކި މިންވަރެއް ހާއްސަކުރަން ވަނީ ނިންމައިފައެވެ.
މީގެ އިތުރުން 75 އަހަރުން މަތީގެ މީހުންގެ ތެރެއިން ސިއްހީ ހާލަތަށް ބަލައި އެހީތެރިޔަކު ގެންދަން ޖެހޭ މީހުންނަށް އެ ފުރުސަތު ދޭ ގޮތަށް ހަމަޖެއްސުމަށާއި، ނަމަވެސް އެހީތެރިއެއްގެ ގޮތުގައި ކުރިން ހައްޖުގެ އަޅުކަން އަދާކޮށްފައި ނެތް މީހަކަށް އެ ހާލަތުގައި އިސްކަން ދިނުމަށް ވެސް ނިންމާފައިވެއެވެ.
އަދި ކުރިން ހައްޖުގެ އަޅުކަން އަދާކުރި މީހަކަށް އިތުރު ފުރުސަތެއް ދެވޭނީ އެންމެ ފަހުން ހައްޖުގެ އަޅުކަން އަދާކުރިތާ ހިޖުރީގޮތުން ފަސް އަހަރު ވުމުން ކަމަށް ވެސް މިއަދު ވަނީ ނިންމައިފައެވެ.
ރައީސް އޮފީހުން ބުނީ، ހައްޖުގެ އަޅުކަން އަދާކުރުމަށް ދިގު އިންތިޒާރެއްގައި ތިބި މީހުންނަށް ހައްލު ހޯދައިދިނުމުގެ ގޮތުން ރާއްޖެއަށް ސައުދީ ސަރުކާރުން ދޫކުރި ކޯޓާ އިތުރުކުރުމަށް ދިވެހި ސަރުކާރުން މަސައްކަތްކުރަމުންދާ ކަމަށެވެ. ސައޫދީން އާންމުކޮށް ރާއްޖެއަށް ދޫކުރަނީ 1،000 ހައްޖުވެރިންގެ ކޯޓާއެވެ.
