ކުޅުދުއްފުށީ ކުޅީގައި ގުޑުގުޑާ ދޫނިތަކަށް ތިބޭ ގަޑީގައި އެ ކުޅީގައި ކެނޯ ދުއްވުމަކީ މަނާކަމެއް ކަމުގައި ކުޅުއްދުފުށީ ސިޓީ ކައުންސިލުން ބުނެފިއެވެ.
ކުޅުދުއްފުށީ ސިޓީ ކައުންސިލުން ބުނީ 2021 ވަނަ އަހަރުން ފެށިގެން ކޮންމެ އަހަރެއްގެ އިރުވާ މޫސުމުގައިވެސް ކުޅުދުއްފުށި ކުޅިއަށް ޒިޔާރަތްކުރަމުންދާ ގުޑުގުޑާ ދޫނިތަކުން އެ ރަށަށް އުފާވެރިކަމާއި ދިރުން ގެނެސްދޭ ކަމަށެވެ. އަދި މި ފަދަ މޫސުމީ ދޫނި ރަށުގައި މަޑުކޮށްގެން ތިބުމަށް އެސޮރުމެންނަށް އަމާން ފަސޭހަ މާހައުލެއް ހޯދައިދިނުމަކީ އެންމެންގެ ޒިންމާއެއް ކަމުގައި ކައުންސިލުން ވަނީ ފާހަގަކޮށްފައެވެ.
އެހެންނަމަވެސް ބައެއް ފަރާތްތަކުން ދޫނިތަކާއި މާކައިރިއަށް ދިއުމާއި، ދޫނިތަކަށް ގޯނާވާގޮތަށް ކުޅީގައި ކެނޯ ދުއްވާކަމުގެ ޝަކުވާ ގިނަ ރައްޔިތުންގެ ފަރާތުން ހުށަހަޅަމުން އަންނަކަމަށް ކުޅުދުއްފުށީ ސިޓީ ކައުންސިލުން ވަނީ ބުނެފައެވެ. އެހެންކަމުން ގުޑުގުޑާ ދޫނި ކުޅީގައި ތިބޭއިރު ކުޅީގައި ކެނޯ ދުއްވުމަކީ މަނާކަމެެއް ކަމެއްކަމަށާއި ޑްރޯން ދުއްވާ ފަރާތްތަކުންވެސް ދޫނިތަކަށް އުނދަގޫވާފަދަ އެއްވެސް އަމަލެއް ނުހިންގުމަށް ކައުންސިލުން ވަނީ އިލްތިމާސްކޮށްފައެވެ.
ކުޅީގައި ކެނޯ ދުއްވާނަމަ ނުވަތަ ދޫނިތަކަށް އުނދަގޫވާ ފަދަ އަމަލުތައް ހިންގާނަމަ 7328831 އަށް ގުޅައި ރިޕޯޓް ކުރުމަަށް ކައުންސިލުން ވަނީ އެދިފައެވެ.
މާކަނާ އާއިލާއަށް ނިސްބަތްވާ ގުޑުގުޑާ ދޫނިތައް ވަނީ މިދިޔަ އަހަރުގެ އިރުވައި މޫސުމާ ދިމާކޮށްވެސް ކުޅުދުއްފުށީގެ އިތުރުން ށ.ފުނަދޫ ކުޅިއަށްވެސް ޒިޔާރަތްކޮށްފައެވެ.
