ރާއްޖޭގެ ބައިވެރިވުމެއް ނެތި މޫސުމަށް އަންނަ ނޭދެވޭ ބަދަލުތަކުގެ އަސަރުގެ އަގު ރާއްޖެއިން އަދާކުރަން ޖެހިފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިއްޔެ މާލެއަށް ކުރި ވިއްސާރައިގައި މުޅި މާލޭގައި ފެންބޮޑުވެ، ދަތުރުފަތުރުތައް ހުއްޓުމަކަށް އައިސްފައިވާއިރު ގިނަ އަދަދެއްގެ ސައިކަލުތައްވެސް ފެންގަނޑުގައި އޮޔާ ދާތަން ފެންނަ މަންޒަރުތައް ސޯޝަލް މީޑިއާގައި ވަނީ ދައުރުވެފައެވެ.
މިކަމާ ގުޅުވާ އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ ރާއްޖޭގެ ބައިވެރިވުމެއް ނެތި މޫސުމަށް އަންނަ ނޭދެވޭ ބަދަލުތަކުގެ އަސަރުގެ އަގު ރާއްޖެއިން އަދާކުރަން ޖެހިފައިވާ ކަމަށާއި، މޫސުމަށް އަންނަ ބަދަލުތަކާއެކު ދުނިޔެ ހޫނުވަމުންދާ މިންވަރު އިތުރުވާނަމަ އިއްޔެ މާލެއިން ފެނުނު މަންޒަރު ތަކުރާރުވެ ގިނައިން ފެންނާނެ ކަމަށެވެ.
ނަޝީދަކީ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަގާމުގައި ހުންނެވި ބޭފުޅާވެސް މެއެވެ. ވީޑިއޯއަކާއެކު ކުރެއްވި ޕޯސްޓެއްގައި ނަޝީދު ވަނީ މޫސުމަށް އަންނަ ބަދަލުގެ ސަބަބުން ރާއްޖެ އަށް ކުރާ އަސަރުތަކާމެދު ކަންބޮޑުވުން ފާޅުކުރައްވާ، މިކަމުން ލިބޭ ގެއްލުންތަކުން އަރައިގަތުމަށް ފަންޑުވެސް ނުލިބޭކަމުގައި ފާހަގަކުރައްވާފައެވެ.
ފާހަގަކޮށްލެވޭ ގޮތުގައި އިއްޔެ މާލެއަށް ކުރި ވިއްސާރައިގައި މިއަދު ހެނދުނާ ހަމައަށް 30،000 ޓަނަށް ވުރެ ގިނަ ފެން ހިންދާފައިވާ ކަމަށް އެމްއެންޑީއެފް އިން ވަނީ ބުނެފައެވެ.
އިއްޔެ ފަތިހު ވާރޭ ވެހެން ފެށިގޮތަށް ވާރޭ ވެހުން މެދުކަނޑާލާފައި ވަނީ ރޭގެ 7:30 ހާއިރުއެވެ. އެއަށް ފަހު ރޭގެ 10 ޖެހުމާ ހަމައަށް އައި އިރު ވެސް މާލޭގެ މަގުތަކުން ފެން ހިނދިފައެއް ނުވެއެވެ. އާންމުކޮށް މާލޭގައި ފެންބޮޑުވާ ސަރަހައްދުތަކުގައި ހުރި އެތައް ގެތަކަކާއި ފިހާރަތަކެއްގެ ތެރެއަށް ފެން ވަދެ އާންމުން އަމިއްލައަށް ފެންހިނދުމަށް ވަނީ އެތައް މަސައްކަތެއް ކޮށްފައެވެ. އެގޮތުން މާލޭގެ 11 ސަރަހައްދެއްގައި 16 ޕަންޕު ބަހައްޓައިގެން ފެން ހިންދުމުގެ މަސައްކަތް ވަނީ ކޮށްފައެވެ.
އާންމުންނަށް އެހީވުމަށް މާލެ ސިޓީ ކައުންސިލުންނާއި އެމްއެންޑީއެފްގެ އިތުރުން އެންޑީއެމްއޭ އިން ހަރަކާތްތެރިވެފައިވާ އިރު، މާލޭގެ މަގުތަކުން ފެންހިންދުމަށް ޕަންޕް ޖަހައިގެން މަސައްކަތް ކޮށްފައި ވެއެވެ. ގެއްލުންވި ގެތަކަށް އެހީތެރިކަން ފޯރުކޮށް ދީފައިވާ އިރު އެތައް ގެއެއްގެ ދޮރު ކައިރީ ވެލި ބަސްތާ ޖަހައި ދިނުމުގެ މަސައްކަތް ވަނީ ކޮށްފައެވެ.
ނަމަވެސް މެޓް އޮފީހުން މިއަދު ބުނީ ކުރިއަށް އޮތް 48 ގަޑިއިރު ތެރޭ މޫސުން ރަނގަޅުވަމުން އަންނާނެ ކަމަށް ލަފާ ކުރެވޭ ކަމަށެވެ. ނަމަވެސް މިއަދުގެ އިރުއޮއްސި 6 ޖެހުމާ ހަމައަށް އުތުރާއި މެދުރާއްޖެތޭރެގެ ބައެއް ރަށްރަށަށް ގުގުރުމާއެކު ބޯކޮށް ވާރޭ ވެހޭނެ ކަމަށް އެ އޮފީހުން ބުނެއެވެ. އަދި ދެކުނުގެ މަދު ރަށްތަކަކަށް މި ކެރީގެ އަސަރު ކުރި ނަމަވެސް އާންމު ގޮތެއްގައި މޫސުން ރަނގަޅު ވާނެ ކަމަށް އެ އޮފީހުން ބުނެއެވެ.
