ކަނޑުދަތުރު ކުރާއިރު އުޅަނދަށް އެކަށީގެންވާވަރަށް ވުރެ އިތުރަށް މީހުން ނޭރުވުމަށް ފުލުހުން އިލްތިމާސްކޮށްފިއެވެ.
ރާއްޖޭގެ އެކި ކަންކޮޅުތަކަށް މޫސުން ގޯސްވެފައިވާ މި ދުވަސްވަރު އުޅަނދުގައި ސަލާމަތީ ގޮތުން ފުރިހަމަ ކުރަންޖެހޭ ކަންކަން ފުރިހަމަ ވެފައި ވޭތޯ ޔަގީން ކުރުމަށާއި، އުޅަނދަށް އެކަށީގެންވާވަރަށް ވުރެ އިތުރަށް މީހުން ނޭރުވުމަށް ފުލުހުން ވަނީ އިލްތިމާސްކޮށްފައެވެ.
އަދި އުޅަނދުތަކަށް ކަނޑައެޅިފައިވާ މިންގަނޑަށްވުރެ އިތުރަށް މުދާ ބަރު ނުކުރުމަށާއި، މޫސުމާ ބެހޭ އެންމެ ފަހުގެ މައުލޫމާތު ހޯދުމަށް ފުލުހުން ވަނީ އިލްތިމާސްކޮށްފައެވެ.
މީގެއިތުރުން ފުލުހުން ވަނީ އެއްގަމު އުޅަނދުތައް ދުއްވާއިރުވެސް ވައިގަދަ ވަގުތުތަކުގައި ކޮންޓްރޯލް ކުރެވޭ މިންގަނޑެއްގައި ސައިކަލުގެ ސްޕީޑު ހިފެހެއްޓުމަށާއި، ވިއްސާރައިގައި ދުއްވާއިރު ހެޑްލައިޓު ދިއްލުމަށްވެސް އެދިފައެވެ.
ވަޔާއެކު ހަލާކުނުވާނެ ފަދަ ވިއްސާރަ ކޯޓު ބޭނުން ކުރުމަށް އިރުޝާދު ދެމުން ފުލުހުން ބުނީ ބުރުގާ އަޅާ ފަރާތްތަކުން ހާއްސަކޮށް ވަޔާއެކު ބުރުގާ މޫނު މައްޗަށް ނުދާނެ ހެން ސަމާލުކަން ދިނުމަށެވެ.
އާ އަހަރާ ދިމާކޮށް މޫސުން ގޯސްވާނެ ކަމަށް ލަފާކޮށް މެޓު އޮފީހުން ބުނީ ސްރީލަންކާގެ އިރުދެކުނުގައި އުފެދިފައިވާ، ކޮޅިގަނޑާއި ގުޅިފައިވާ ލޯޕްރެޝާ ޓްރެފްގެ ސަބަބުން ޖަނަވަރީ 1 ވަނަ ދުވަހުން ފެށިގެން 5 ވަނަ ދުވަހުގެ ނިޔަލަށް ރާއްޖޭގެ ބޮޑު ބަޔަކަށް ގުގުރުމާއެކު ބޯކޮށް ވާރޭވެހޭނެ ކަމަށެވެ. އަދި ވަޔާއި ކަނޑު ގަދަވެ، އަދި ބައެއް އަތޮޅުތަކަށް އުދައަރާނެ ކަމަށްވެސް މެޓުން ވަނީ ލަފާކޮށްފައެވެ.
މީގެ އިތުރުން މެޓުން ބުނީ އުތުރާއި މެދުރާއްޖެތެރޭގެ އަތޮޅުތަކަށް އުތުރާއި އިރު އުތުރުން ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު 15 މޭލާ 25 މޭލާ ދެމެދުގެ ބާރު މިނެއްގައި ވައިޖެހޭނެކަމަށެވެ. އަދި ވިލާގަނޑުގައި ގަޑިއަކު 50 މޭލަށް ވައިގަދަވާނެ ކަމަށް ލަފާކޮށް މެޓު އޮފީހުން ވަނީ މޫސުމަށް ސަމާލުވުމަށް އިލްތިމާސް ކޮށްފައެވެ.
