މޯލްޑިވިއަންގެ އޮޕަރޭޝަންތައް ފުޅާކުރުމަށް އެ އެއާލައިނަށް ގެންނަ އޭ330 މަރުކާގެ ބޯޓު ގެނައުން ފާހަގަކުރުމަށް އަންނަ ހޯމަ ދުވަހު އެއާޝޯއެއް ބާއްވަން ނިންމައިފިއެވެ.
މާލެ އާއި ހުޅުމާލެ1 އަދި ހުޅުމާލެ2 ސަރަހައްދުގައި އެއާޝޯގެ ހަރަކާތްތައް ކުރިއަށް ގެންދިއުމަށް ހަމަޖެހިފައިވާއިރު، މި ހަރަކާތް އޮންނާނީ އަންނަ ހޯމަ ދުވަހުގެ ހަވީރު 5 އިން 5:30 އާ ދެމެދުކަމަށް މޯލްޑިވިއަނުން ވަނީ ބުނެފައެވެ.
އެއާޝޯގެ ހަރަކާތްތައް ކުރިއަށް ގެންދިއުމަށް ހަމަޖެހިވަނީ:-
- ހުޅުމާލެ ފޭސް 1ގެ އިރުމަތީ ސަރަހައްދު ބީޗު
- ހުޅުމާލޭ ފޭސް 2ގެ އިރުމަތީ ފަރާތު ބީޗު
- މާލޭ އުސްފަސްގަނޑު ސަރަހައްދުގައި
މޯލްޑިވިއަންގެ ފްލައިޓަށް އިތުރު ކުރާ އޭ330 މަރުކާގެ ބޯޓާ އެކު އެ އެއާލައިނުގެ ދަތުރުތައް ޗައިނާގެ ހަތަރު މަންޒިލަކަށް ފަށަން ވަނީ ނިންމައިފައެވެ. އޭގެ ފަހުން ޔޫރަޕުގެ މަންޒިލުތަކަށް ވެސް މޯލްޑިވިއަންގެ ދަތުރުތައް ފުޅާކުރަން ވަނީ ރާވައިފައެވެ.
އައިލެންޑް އޭވިއޭޝަންގައި މިހާރު ވެސް ދުރު ދަތުރުތަކަށް އެއާބަސް އޭ320- 200 މަރުކާގެ ބޯޓަކާއި އޭ 321- 200 މަރުކާގެ ބޯޓެއް ބޭނުންކުރެއެވެ.
