ރާއްޖޭގެ ރިސޯޓެއްގައި ޗުއްޓީ ހޭދަ ކުރަމުން ދިޔަ ޖަޕާނުގެ މަޖިލިސް މެންބަރަކު މަރުވެއްޖެއެވެ.
ފުލުހުން ބުނީ ޅ. އަތޮޅުގެ ރިސޯޓެއްގައި އުމުރުން 70 އަހަރުގެ ޖަޕާނުގެ ޓޫރިސްޓަކު ސްނޯކްލިން އަށް ގޮސް އުޅެނިކޮށް މޫދުގައި މަރުވެފައި އޮއްވާ ފެނުނު މައްސަލައެއް އިއްޔެ ހެނދުނު 8:33 ގައި ރިޕޯޓު ކޮށްފައިވާ ކަމަށެވެ، މި ހާދިސާއާއި ގުޅޭ އިތުރު ތަފްސީލް ފުލުހުން އަދި ހާމަކޮށްފައިނުވާއިރު ބޭރުގެ ބައެއް މީޑިއާތަކުން އަންނަނީ ޖަޕާނުގެ މަޖިލިސް މެންބަރެއް ކަމަށްވާ ޓޮޝިޔުކި އަޑާޗި ރާއްޖޭގައި މަރުވެގެން އުޅޭކަމަށް ރިޕޯޓްކޮށްފައެވެ.
ލިބަރަލް ޑިމޮކްރެޓިކް ޕާޓީ (އެލްޑީޕީ) އާއި ހަވާލާދީ ބޭރުގެ މީޑިއާތަކުން ވަނީ މި މަހުގެ 27 ވަނަ ދުވަހު ޓޮޝިޔުކި އަޑާޗި މަރުވީ ކަނޑުމަތީގެ ހާދިސާއެއްގައިކަމުގައި ބުނެފައެވެ. އަޑަޗީގެ މި ދަތުރަކީ ވިޔަފާރިއެއްގައި ޑިސެމްބަރު 25، 2024 އިން ޖެނުއަރީ 6، 2025 އަށް ޝެޑިއުލް ކުރި ދަތުރެއްކަމަށް މީޑިއާ ރިޕޯޓްތައްވަނީ ބުނެފައެވެ. މިއީ ޖަޕާނުގެ ސިޔާސީ ދާއިރާއަށް ލިބުނު ވަރަށް ބޮޑު ހީނަރުކަމެއް ކަމުގައި އެ ޕާޓީން ވަނީ ފާހަގަކޮށްފައެވެ.
މި ހާދިސާ އާއި ގުޅޭ ގޮތުން އަދި ޖަޕާނާއި ރާއްޖޭގެ ސަރުކާރުގެ ބަހެއް ލިބިފައެއް ނުވެއެވެ.
