ފެނަކަ ކޯޕަރޭޝަނުން، އެލްއެފް ކޮންސްޓްރަކްޝަން ޕްރައިވެޓް ލިމިޓެޑަށް ދައްކަންޖެހޭ 7.9 މިލިއަން ރުފިޔާ 15 ދުވަހުގެ ތެރޭގައި ދެއްކުމަށް ސިވިލް ކޯޓުން ހުކުމް ކޮށްފިއެވެ.
ފެނަކައިގެ މައްޗަށް ކޮށްފައިވާ ހުކުމުގައި އެލްއެފް ކޮންސްޓްރަކްޝަނުން ކޮށްދީފައިވާ މަސައްކަތްތަކުގެ އަގާއި، ވިއްކާފައިވާ މުދަލުގެ އަގުގެ ގޮތުގައި ލިބެންޖެހޭ 7.8 މިލިއަން ރުފިޔާގެ އިތުރުން މައްސަލައިގެ ޝަރީއަތުގެ ހަރަދަށް ވާ 40،000 ރުފިޔާ ދެއްކުމަށެވެ.
އެލްއެފް ކޮންސްޓްރަކްޝަނުން ފެނަކައަށް ކޮށްދީފައިވާ މަސައްކަތްތަކުގެ ތެރޭގައި ހިމެނެނީ:
- ގދ. ދާންދޫ، އަދި ގއ. ކަނޑުހުޅުދޫ އައު އޮފީސް އިމާރާތާއި ވަށާފާރު ރޭނުމުގެ މަސައްކަތް
- ހދ. ވައިކަރަދޫ އިންޖީނުގެ ނުނިމި ހުރި މަސައްކަތް
- ލ. ހިތަދީ އަދި އަދި ނ. ހޮޅަދޫ އޮފީސް އިމާރާތުގެ ނުނިމި ހުރި މަސައްކަތް
- މ. ދިއްގަރު އަދި ރ. މީދޫ އިންޖީނުގޭގެ ވަށާފަރާ ޗިމަން ހެދުމުގެ މަސައްކަތް
- ހދ. ފިނޭ، ތ. އޮމަދޫ އަދި ގއ. ކޮނޑޭ އައު އިންޖީނުގެ އިމަރާތްކުރުމުގެ މަސައްކަތް
- މ. މާއުނގޫދޫ އައު އިންޖީނުގެ އަދި އޮފީސް އިމާރަތުގެ ނުނިމި ހުރި މަސައްކަތް
- ހދ. ހިރިމަރަދޫ ޑޭ ޓޭންޓު އޭރިޔަ، މެއިން ޓޭންކް އަދި ޗިމްނީ އިމަރާތްކުރުމުގެ މަސައްކަތް
2019 އިން 2022 އާ ދެމެދު ރާއްޖޭގެ އެކި ރަށްރަށުގައި ކޮށްދީފައިވާ އޮފީސް އިމާރާތްކުރުމާއި، އިންޖީނުގެ އިމާރާތްކުރުމާއި، ވަށާފާރު ރޭނުން ފަދަ މަސައްކަތްތަށްވާ ފައިސާ ހޯދުމަށް ހުށަހެޅި މި މައްސަލައިގައި ސިވިލް ކޯޓުން މި ހުކުމް ކޮށްފައިވަނީ ފެނަކައިން މައްސަލައަށް ޖަވާބުދާރީވެފައި ނުވުމާ ގުޅިގެން، ޣައިރު ހާޒިރުގައެވެ.
