ފިލަން ޖެހޭ ކަމެއް ކުރައްވާފައި ނުވާނެ ކަމަށާއި އިންޑިއާއަށް ދިޔައީ ބޭސްފަރުވާއަށް ކަމަށް ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވެއްޖެއެވެ.
މުއާޒް މިފަދައިން ވިދާޅުވެފައި ވަނީ އޭނާ އިސްތިއުފާދެއްވީ ކޮރަޕްޝަންގެ ތުހުމަތުތައް އޮތުމުން ކަމަށާއި އޭނާ ރާއްޖެއިން ބޭރަށް ގޮސްފައިވަނީ ފިލަން ކަމަށް ބައެއް ފަރާތްތަކުން ތުހުމަތު ކުރަމުންދާ ދަނޑިވަޅެއްގައެވެ. ނަމަވެސް މުއާޒް ވަނީ ސަރުކާރުން އޭނާގެ މައްޗަށް ކޮރަޕްޝަންގެ އެއްވެސް ތުހުމަތެއް ނުކުރާ ކަމަށް ވިދާޅުވެފައެވެ.
މިއަދު އެކްސްގައި ކުރެއްވި ޕޯސްޓެއްގައި މުއާޒް ވިދާޅުވީ އާއިލާއާއެކު އިންޑިއާއަށް ވަޑައިގެންނެވީ ބޭސްފަރުވާއަށް އަދި ޗުއްޓީ ހޭދަކުރެއްވުމަށް ކަމަށެވެ. އަދި ފިލަން ޖެހޭ ވަރު ކަމެއް ކުރައްވާފައި ނުވާނެ ކަމަށާއި ވަރަށް އަވަހަށް އެނބުރި ރާއްޖެއަށް ވަޑައިގަންނަވާނެ މުއާޒް ވިދާޅުވިއެވެ.
ފެނަކައިގެ އެމްޑީގެ މަގާމުން މުއާޒް އިސްތިއުފާދެއްވާފައި ވަނީ މިދިޔަ ހޯމަ ދުވަހުއެވެ. މަގާމުން އިސްތިއުފާދެއްވި ކަން ހާމަކުރައްވައި ރައީސް ޑރ. މުހައްމަދު މުއިއްޒަށް ފޮނުއްވި ސިޓީއެއްގައި މުއާޒް ވިދާޅުވީ، ފެނަކައިގެ ހިންގުން ހަރުދަނާކުރުމަށް ކަމާބެހޭ އިދާރާތަކުން އެއްބާރުލުން ނުލިބޭ ކަމަށެވެ.
މިއަދު ރައީސަށް ފޮނުއްވި އިސްތިއުފާގެ ސިޓީގައި މުއާޒް ފާހަގަކުރެއްވި ބައެއް ކަންކަމުގެ ތެރޭގައި ހިމެނެނީ:
- ފެނަކައިން ހިދުމަތްދޭ ރަށްރަށުގެ ހިދުމަތްތައް ރަނގަޅަށް ނުބެލެހެއްޓި އޮތުމުން ފާއިތުވެދިޔަ އަހަރުތަކުގެ ބެކްލޮގް ފިލުވައިނުލެވުން
- ކުންފުންޏާ އޭނާ ހަވާލުވިއިރު 4.3 ބިލިއަން ރުފިޔާގެ ދަރަންޏެއް އޮތުން
- ބޭނުންވާ ވަރަށް ވުރެ އިތުރަށް މުވައްޒަފުން ހޯދަން ޖެހުން
- އިދާރާތަކުން އެކަށީގެންވާ އެއްބާރުލުމެއް ނުލިބުން
"މި ދެންނެވި ހާލަތުން އަރައިގަތުމަށްޓަކައި ކުންފުނިން ތައްޔާރުކޮށްފައިވާ ޕްލޭންތައް ވާނީ ކަމާ ގުޅުންހުރި ހުރިހާ ފަރާތްތަކަށް ހިއްސާ ކުރެވިފައެވެ. ނަމަވެސް މިކަމަށް އަލިމަގެއް މިއަދާ ހަމައަށް ވެސް ފެނިފައިނުވާ ވާހަކަ ދެންނެވީމެވެ،" އިސްތިއުފާގެ ސިޓީގައި އޭނާ ލިޔުއްވާފައިވެއެވެ.
