ރާއްޖެއަށް، ދިރުވާލައިގެން މަސްތުވާތަކެތި އެތެރެކުރަން އުޅުނު ދެ މީހުން ހައްޔަރު ކޮށްފިއެވެ.
މި މައްސަލައިގައި ހައްޔަރު ކޮށްފައި ވަނީ ނ. މަނަދޫ، ޕީކޮކް، އިހްސާން އިސްހާގް (33) އާއި މއ. ސޭބޫ، މުހައްމަދު ފާރިޝް (40) އެވެ.
މި ދެ މީހުން މިހާރު ދޫނިދޫ މެޑިކަލްސްގައި އެޑްމިޓް ކޮށްފައި ވާއިރު ކްރިމިނަލް ކޯޓުން ވަނީ މި ދެ މީހުންގެ ބަންދަށް ފަސް ދުވަސް ޖަހާފައެވެ.
މިމީހުން ބަންދުކުރުމަށް ނެރުނު ކޯޓު އަމުރުގައި ބުނާގޮތުން މި ދެމީހުން ރާއްޖެ އައުމުން ސްކޭން ކުރިއިރު ހަށިގަނޑުގައި ފޮރިން ބޮޑީސް ހުރިކަމަށް ތުހުމަތު ކުރެވިގެން އެޑްމިޓްކޮށްފައިވާކަން ވަނީ ފާހަގަކޮށްފައެވެ. އަދި އެޑްމިޓްކޮށްފައިވާ ހާލަތު ބަދަލުވުމުން، 24 ގަޑިއިރު ތެރޭ އަލުން ކޯޓަށް ހާޒިރުކުރުމަށް އަމުރުކޮށްފައިވެއެވެ.
ދިރުވާލައިގެން މަސްތުވާތަކެތި އެތެރެކުރުމުގެ މައްސަލަތައް ފެންމަތިވަމުން އަންނައިރު، މިފަދަ މައްސަލަތަކުގައި ދިވެހިންގެ އިތުރުން ބިދޭސީން ހައްޔަރުކުރާ އަދަދު ގިނަކަން ފާހަގަކޮށްލެވެއެވެ.
