އާ ވިޔަފާރިތައް ތަރައްގީކުރުމަށް އެހީވުމުގެ ގޮތުން ބީއެމްއެލް އިން ދޫކުރާ ސްޓާޓަޕް ގްރާންޓު ލިބޭ ދެ ވިޔަފާރި ހޮވައިފިއެވެ.
މި ގްރާންޓަކީ އަލަށް ފަށާ ވިޔަފާރިތަކާއި މިހާރު ކުރިއަރަމުން އަންނަ ވިޔަފާރިތައް ތަރައްގީކުރުމަށް އެ ބޭންކުން ދޭ 500،000ރ. ގެ ހިލޭ އެހީއެކެވެ.
މި އަހަރު މި ގްރާންޓު ކާމިޔާބު ކުރީ ނިޔާފް މުހައްމަދު، ދަ އައިލެންޑް ފެކްޓްރީ އާއި މުހައްމަދު ޝާމިން އަލީ، އާފްޓާ ސްކޫލްއެވެ.
ދަ އައިލެންޑް ފެކްޓްރީއަށް ގްރާންޓު ދިނީ ރާއްޖޭގައި ތައްޔާރުކުރާ މަހުގެ އުފެއްދުންތަކުގެ ސިނާއަތަށް، ފެންވަރު ރަނގަޅު، އީޖާދީ ލުއިކާނާ އުފެއްދުމަށް ފެކްޓްރީއެއް ގާއިމްކުރުމަށެވެ.
އާފްޓާ ސްކޫލަށް ގްރާންޓު ދިނީ އަމިއްލައަށް ފަރުމާކޮށްގެން ރާއްޖޭގައި ސްޓެމް (ސައިންސް، ޓެކްނޮލޮޖީ، އިންޖީނިއަރިން، މެތަމެޓިކްސް) ކިޓު ދަރިވަރުންނަށް ފޯރުކޮށްދިނުމާއި ތަމްރީނު ޕްރޮގްރާމްތައް ހިންގުމަށެވެ.
ބީއެމްއެލްއިން ބުނީ ސްޓާޓަޕް ގްރާންޓް ކާމިޔާބުކުރި ފަރާތްތައް ހޮވީ ދެ މަރުހަލާއަކަށް ބަހާލައިގެން ގެންދިޔަ އިވެލުއޭޝަން ޕްރޮސެސްއަކަށް ފަހު ކަމަށެވެ. މި ގްރާންޓު ދިނުމަށް ފުރަތަމަ މަރުހަލާގައި ބިޒްނަސް ޕްލޭންތައް އިވެލުއޭޓް ކުރުމަށް ފަހު އެންމެ ފާހަގަކޮށްލެވޭ 10 ވިޔަފާރި ޝޯޓްލިސްޓުކޮށްފައިވާކަމަށް ބީއެމްއެލް އިން ވަނީ ބުނެފައެވެ. އަދި ދެވަނަ މަރުހަލާގައި ޝޯޓްލިސްޓްވި ފަރާތްތަކުން އެފަރާތުގެ ވިޔަފާރިއާ ގުޅޭ ޕްރެސެންޓޭޝަން އިވެލުއޭޝަން ކޮމިޓީއަށް ހުށަހެޅުނުކަމަށް އެ ކުންފުނިން ވަނީ ބުނެފައެވެ.
