އދ. ފެންފުށީގައި ގަވާއިދާ ހިލާފަށް މަގުމަތީގައި ކެއްކުމާއި އެ ނޫން ވެސް ކަންތައްތައް ކުރަމުން އަންނަ މައްސަލަ ބޮޑުވެ، އުސޫލުގެ ދަށުން ފިޔަވަޅު އެޅުމަށް އެ ރަށުގެ ކައުންސިލުން ނިންމައިފިއެވެ.
ފެންފުށީ ކައުންސިލުން ބުނީ އާންމު ތަންތަނަށާއި މަގުމައްޗާއި ފަޅުތެރެއަށް ދޫކޮށްލާފައިވާ ތަކެތި ނެގުމާއި، ގޭގެ ގޯތީގައި ނުވަތަ މަގުގައި ހައްދާފައިވާ ގަސްތައް ކޮށައި ބެލެހެޓުމުގެ އުސޫލުގެ ހަތްވަނަ މާއްދާގައިވާ ގޮތުން ފެންފުށީ ކައުންސިލުން ހުއްދަ ނުނަގައި މަގުމަތީގައި ޖޯއްޔާއި ގޮނޑި އަދި މޭޒުފަދަ ތަކެތި ބަހައްޓައިގެން އެއްވެސް ކަމެއް ކުރުމަކީ މަނާކަމެއް ކަމަށެވެ.
އެހެންނަމަވެސް ފަހަކަށް އައިސް ބައެއްފަރާތްތަކުން މަގުމަތީގައި އުނދުންޖައިގެން ކެއްކުމުގެ މަސައްކަތް ކުރަމުންދާކަން ފާހަގަކުރެވިފައިވާކަމަށް ކައުންސިލުން ވަނީ ބުނެފައެވެ. މިކަމަކީ އާންމު ތަންތަނަށާއި މަގުމައްޗަށާއި ފަޅުތެރެއަށް ދޫކޮށްލާފައިވާ ތަކެތި ނެގުމާއި ގޭގެ ގޯތީގައި ނުވަތަ މަގުގައި ހައްދާފައިވާ ގަސްތައް ކޮށައި ބެލެހެޓުމުގެ އުސޫލު ގެ 7 ވަނަ މާއްދާގެ (ށ) ދަށުން މަނާކުރެވިފައިވާ ކަމެއްކަމުގައި ކައުންސިލުން ވަނީ ބުނެފައެވެ.
އެ ކައުންސިލުން ބުނީ މިއަދުން ފެށިގެން މި އުސޫލާ ހިލާފުވާ ފަރާތްތަކަށް، އުސޫލުގެ 10 ވަނަ މާއްދާގެ ދަށުން ފިޔަވަޅު އަޅާނެކަމަށެވެ.
