ރަޝިއާގެ މަދަދު ލިބި އަސްކަރީ ގޮތުން އެހީތެރިވަމުން ދިޔަ ސީރިއާގެ ބައްޝާރުލް އަސަދުގެ ވެރިކަން ވައްޓާލީ އެމެރިކާގެ މަދަދާއެކު ކަމަށް ހާރިޖީ ވަޒީރު އެންތަނީ ބްލިންކެން އަށް އެއްބަސް ވެވަޑައިގެންނެވިއްޖެއެވެ.
އުރުދުންގައި ބޭއްވި ސީރިއާގެ މުސްތަގުބަލާ ބެހޭ ސަމިޓުގައި ވާހަކަ ދައްކަވަމުން އެމެރިކާގެ ހާރިޖީ ވަޒީރު ވިދާޅުވީ، ބައްޝާރުގެ ވެރިކަން ވައްޓާލި ހަޔާތު ތަހްރީރް އަލް ޝާމް (އެޗްޓީއެސް) އާ އެމެރިކާއިން މުއާމަލާތު ކުރަމުން ގެންދިޔަ ކަމަށާއި އަދި ސީރިއާގައި ހަރަކާތްތެރިވާ އެހެނިހެން ޖަމާއަތްތަކާވެސް މުއާމަތާލު ކުރެއްވި ކަމަށް ވިދާޅުވިއެވެ.
އެޗްޓީއެސް އަކީ ޓެރަރިސްޓް ޖަމާއަތެއް ކަމަށް އެމެރިކާ އާއި ހުޅަނގުގެ އިތުރުން މެދުއިރުމަތީގެ ބައެއް ގައުމުތަކުން ވެސް އޮތީ ކަނޑައަޅާފައެވެ.
އެކިއެކި ފަރާތްތަކުން ސުވާލު އުފައްދަނީ އެޗްޓީއެސް އަކީ ޓެރަރިސްޓުން ކަމަށް ކަނޑައަޅާ އެމީހުންނާ ސިއްރު ގުޅުމެއް ބާއްވައިގެން ބައްޝާރުގެ ވެރިކަން ވައްޓާލުމަށް ފަހު ދެން އެ ޖަމާއަތާމެދު އެމެރިކާގެ ތަސައްވުރު ބަދަލު ކުރާނީތޯ ނުވަތަ ނޫންތޯއެވެ. އެ ސުވާލުގެ ޖަވާބުގައި އެމެރިކާގެ އޮފިޝަލުން ވިދާޅުވަނީ، ޓެރަރިސްޓް ސެލްތައް އުފެދި ހަރަކާތްތައް ފުޅާވެގެން ދިޔަ ނުދާނެ ކަމުގެ ޔަގީންކަން ހޯދާނެ ކަމަށެވެ. ޓެރަރިސްޓުންގެ ލިސްޓުން އެޗްޓީއެސް ނުނަގާނެ ކަމަކަމަށް ވިދާޅެއް ނުވެއެވެ.
އުރުދުންގައި ކުރިއަށް ދިޔަ މަހާސިންތާގައި އީޔޫގެ ފޮރިން ޕޮލިސީގެ އިސް ވެރިއަކު ވިދާޅުވީ، އެޗްޓީއެސް ކުރިން ފެންނަ ގޮތް، ނުވަތަ އެ ޖަމާއަތުގެ މޫނުމަތި މިހާރު ބަދަލު ކުރަމުން ދާ ކަމަށާއި، އެ ޖަމާއަތާއެކު ރަނގަޅު ގުޅުމެއް އޮތް ކަމަށެވެ. އަދި ސީރިއާ އާރާސްތު ކުރުމަށާއި އެތެރޭގެ ޑިމޮކްރަސީ ގާއިމުކޮށް އިންސާނީ ހައްގުތައް ކަށަވަރުކޮށް ދީނީ މިނިވަންކަން ޔަގީން ކުރަން މަސައްކަތް ކުރާ ކަމަށެވެ.
