ސަރުކާރުން ޓެކްސީ ޑްރައިވަރުންގެ ކަންބޮޑުވުންތަކުގެ އަޑުއެހުމަށާއި، ސަރުކާރުން ޓެކްސީކުރަން އުޅޭ އުޅުން މިހާރުން މިހާރަށް ހުއްޓާލުމަށް ދަ ޑިމޮކްރަޓުން ގޮވާލައިފިއެވެ.

މާލެ އާއި ހުޅުމާލެއާ ދެމެދު މިހާރަށް ވުރެ ރަނގަޅަށް ޓެކްސީގެ ހިދުމަތް ދިނުމުގެ ބޭނުމުގައި ސަރުކާރުން ޓެކްސީ ފްލީޓެއް ފެށުމަށް ނިންމި ނިންމުން ކުށްވެރިކޮށް އެ ޕާޓީން ނެރުނު ބަޔާނެއްގައި ބުނީ، ޓެކްސީ ދުއްވާ ފަރާތްތަކުން އިހުތިޖާޖު ކުރުމާއެކު ސަރުކާރަށް ތަކުރާރުކޮށް އިލްތިމާސްކޮށް ގޮވާލަމުންދާ ގޮވާލުންތަކަށް ސަރުކާރުން ބީރުކަންފަތެއްދީ ގޮންޖަހަމުން ގެންދާގެންދިއުން އެ ޕާޓީން ކުށްވެރި ކުރާ ކަމަަށެވެ.

އަދި ޓެކްސީ ދުއްވާ ފަރާތްތަކުން އިއްޔެ ހަވީރު އިހްތިޖާޖު ކޮށްފައި ވަނީ އެފަރާތްތަކުގެ އާމްދަނީއާއި ދިރިއުޅުމާ ގުޅިފައިވާ ސީރިއަސް މައްސަލައަކާ ގުޅިގެންކަން އެ ބަޔާނުގައި ވަނީ ބުނެފައެވެ.

"އާންމުދަނީ ހޯދުމަށް އާންމު ފަރާތްތަކުން ދޭ ހިދުމަތްތަކުގެ ތެރެއަށް ސަރުކާރުން ވަންނަމުން ގޮސް އެންމެ ފަހުން ސަރުކާރުން ޓެކްސީ ކުރަން ފެށުމަކީ ޓެކްސީގެ ހިދުމަތް މިހާތަނަށް ފޯރުކޮށްދެމުން ގެންދިއަ ޓެކްސީ ސެންޓަރުތަކަށާއި ޑްރައިވަރުންނަށް އިންތިހާއަށް ގެއްލުންވެ، އެ ފަރާތްތަކުގެ އާންމުދަނީ ހުއްޓިގެންދާނޭކަމެއް ކަމަށް މި ޕާޓީން ދެކެމެވެ." ޑިމޮކްރަޓްސް އިން ނެރުނު ބަޔާނުގައި ވެއެވެ.

އަދި އިހުތިޖާޖްކުރި ޓެކްސީ ޑްރައިވަރުންގެ ތެރެއިން ބަޔަކު ހައްޔަރުކުރުމާއި ޓެކްސީތައް ޓޯކުރުމަކީ މި މައްސަލައަށް އޮތް ހައްލުކަމަށް ނުދެކޭ ކަމަށާއި ސަރުކާރުން ޓެކްސީ ޑްރައިވަރުންގެ ކަންބޮޑުވުންތަކުގެ އަޑުއެހުމަށާއި، ސަރުކާރުން ޓެކްސީކުރަން އުޅޭއުޅުން މިހާރުން މިހާރަށް ހުއްޓާލުމަށް ދަ ޑިމޮކްރެޓްސް އިން ސަރުކާރަށް ވަނީ ގޮވާލާފައެވެ.

ރޭ ޓެކްސީ ޑްރައިވަރުން އިހުތިޖާޖުކޮށްފައި ވަނީ ދުއްވާ އެއްޗިއްސަށް ހުޅުމާލެއިން ހައިވޭއަށް ނޭރޭ ގޮތަށް އެ މަގު ބްލޮކް ކުރުމަށް ފަހު އެވެ. ނަމަވެސް، ފަހުން ފުލުހުން ގޮސް ވަނީ ޓެކްސީތައް ދުރަށް ޖައްސުވައި އެ މަގުން ދަތުރުކުރެވޭނެ ގޮތް ހެދިއިރު މަގު ބްލޮކް ކުރި ޓެކްސީތައް ފުލުހުން ވަނީ ޓޯ ކޮށްފައެވެ.

ހަބަރު ދަ ޑިމޮކްރެޓްސް