ރޯދަމަހު ތަކެތީގެ އަގު ބޮޑުވިޔަ ނުދިނުމަށް އެސްޓީއޯއާއެކު ބައްދަލުވުމެއް ބާއްވައިފިއެވެ.
އިކޮނޮމިކް މިނިސްޓްރީ އިން ބުނީ ކުރިއަށް އޮތް 2025 ވަނަ އަހަރުގެ ރޯދަމަހަށް ތައްޔާރުވުމުގެ ގޮތުން އިކޮނޮމިކް މިނިސްޓަރު މުހައްމަދު ސައީދު އެސްޓީއޯގެ ޓީމާ މިއަދު ބައްދަލުކުރައްވާފައިވާކަމަށާއި، މި ބައްދަލުވުމުގައި ތަކެތީގެ އަގުތައް ބޮޑުވިޔަ ނުދީ ހިފެހެއްޓުމަށް ހާއްސަ ސަމާލުކަމެއް ދެއްވުމަށް މަޝްވަރާކުރެވުނު ކަމަށެވެ.
މީގެއިތުރުން ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތްވާ ގޮތުގެ މަތިން އަސާސީ ބޭނުންތަކުގެ މުދާ މެދުނުކެނޑި ލިބެން ހުރުން ކަށަވަރު ކުރުމަށްވެސް ހާއްސަ ސަމާލުކަމެއް ދެއްވާފައިވާކަމަށް އިކޮނޮމިކް މިނިސްޓްރީ އިން ވަނީ ބުނެފައެވެ.
ފާހަގަކޮށްލެވޭ ގޮތުގައި ރައީސް ޑރ. މުހައްމަދު މުއިއްޒު ވަނީ ކުރިއަށް އޮތް ރޯދަ މަހު ކޮންމެ ގޭބީސީއަކަށް މަސްދަޅު ކޭހެއް ދެއްވާނެ ކަމަށް ވިދާޅުވެފައެވެ. ސަރުކާރަށް 52 ހަފްތާ ފުރުމުގެ މުނާސަބަތުގައި ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވަނީ ކާޑުގެ ބަދަލުގައި ކޮންމެ ގޭބީސީއަކަށް އަންނަ ރޯދަމަހު މަހު ހިލޭ މަސްދަޅު ކޭހެއް ދެއްވާނެ ކަމަށާއި، މި އަހަރުގެ ރޯދަމަހު 82 ހާސް ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ފޯރުކޮށްދެވުނު ކަމަށް ވިދާޅުވެފައެވެ.
މި އަހަރުގެ ރޯދަމަހު ސަރުކާރުގެ ހަރަދުގައި ކޮންމެ ގެއަކަށް 10 ކިލޯގެ ހަނޑޫ ބަސްތާއަކާއި 10 ކިލޯގެ ފުށް ބަސްތާއެއް ވަނީ ހަދިޔާކޮށްފައެވެ.
