އަޑުއެހުންތައް ކުރިއަށް ގެންދިއުމުގައި ދަތިތައް ހުރުމުން، މިމަހު އެއްކޮށް ރިސެސްއަށް ނުދިއުމަށް ކްރިމިނަލް ކޯޓުގެ ގާޒީންގެ މަޖިލީހުން ނިންމައިފިއެވެ.
ސުޕީރިއާ ކޯޓުތައް ކޮންމެ އަހަރަކު ދެ ފަހަރު ރިސެސްއަށް ދާއިރު އާންމުގޮތެއްގައި ޖޫން މަހާއި ޑިސެމްބަރު މަހު ކޯޓުތައް އޮންނަނީ ރިސެސްގައެވެ.
ކްރިމިނަލް ކޯޓުން ނެރުނު ބަޔާނެއްގައި ބުނީ ކޯޓުގެ އިމާރާތަށް ދިމާވެފައިވާ ޖާގައިގެ ދަތިކަން އަދިވެސް ހައްލުވެފައިނުވާ ކަމަށެވެ. މިވަގުތުވެސް ކޯޓުން މަސައްކަތް ކުރަނީ ޝަރީއަތްކުރާ މާލަންތައް އެކި ގާޒީންނަށް އެކި ދުވަސްތަކަށް ބަހާލައިގެން ކަމަށް ކްރިމިނަލް ކޯޓުންވަނީ ފާހަގަކޮށްފައެވެ. މީގެ ސަބަބުން ކޯޓުން އެންމެ ބޭނުންވާ މިންވަރަށް އަޑުއެހުންތައް ތައާވަލުކުރުމުގައި ގޮންޖެހުންތައް އެބަހުރިކަން ފާހަގަކޮށް ކްރިމިނަލް ކޯޓުން ބުނީ އެހެންކަމުން މުޅި މަސް އެއްކޮށް ރިސެސްއަށް ނުދިއުމަށް ގާޒީންގެ މަޖިލީހުން ނިންމަވާފައިވާ ކަމަށެވެ.
ކްރިމިނަލް ކޯޓުން ބުނީ ހުޅުމާލޭގައި ކުރިން ކޯވިޑް ފެސިލިޓީގެ ގޮތުގައި ބޭނުންކުރި އިމާރާާތަށް އެ ކޯޓުގެ މަސައްކަތްތައް ބަދަލުކުރެވިއްޖެނަމަ ޖާގައިގެ ދަތިކަމަށް ހައްލު ލިބި، މައްސަލަތައް އަވަސްވެގެންދާނެކަމަށެވެ.
ކްރިމިނަލް ކޯޓުން މީގެ ކުރިން ނިންމާފައިވަނީ މި މަހުގެ 15އިން ފެށިގެން ރިސެސްއަށް ދިއުމަށެވެ.
