ފައިސާ ނުދިނުމުން މަންމައާއި ކޮއްކޮއަށް ވަޅިން ހަމަލާދޭނެ ކަމަށް ބުނެ އިންޒާރު ދިން މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ ވ.ހުވަފެން މާލެ، އުމުރުން 32 އަހަރު މުހައްމަދު ޝަފީގްއެވެ.
އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުން އޭނާގެ ބަންދަށް ވަނީ 7 ދުވަހުގެ މުއްދަތެއް ޖަހާފައެވެ.
ކްރިމިނަލް ކޯޓުގެ އަމުރުގައި ބުނެފައި ވަނީ ކުށްކުރި ކަމަށް އޭނާގެ މައްޗަށް ތުހުމަކުރެވޭ ވަރަށް ހެކި ހުށަހަޅާފައިވާ ކަމަށެވެ. އަދި އޭނާގެ މަންމައާއި ކޮއްކޮއަށް ވަޅިން ހަމަލާދޭނެ ކަމަށް ބުނެ އިންޒާރު ދިން ކަމަށް ތުހުމަތު ކުރެވޭ ކަމަށެވެ.
އޭނާގެ ކޮޓަރިން 2 ވަޅި ފެނިފައިވާ ކަމަށާއި އިންޒާރު ދިނުން ގުޅިފައި ވަނީ އޭނާ ބުނެގެން ފައިސާ ނުދިނުމާ ކަމަށް ވެސް ކޯޓު އަމުރުގައި ފާހަގަކޮށްފައިވެއެވެ.
ކްރިމިނަލް ކޯޓުގެ އަމުރުގައި ބުނެފައި ވަނީ އޭނާ ހައްޔަރުކޮށްފައި ވަނީ ޖިނާއަތުގެ އިޖުރާއަތާ އެއްގޮތަށް ކަމަށެވެ.
