ރާއްޖޭގެ ކަނޑުގެ ސަރަހައްދުން 400 ކިލޯގެ މަސްތުވާތަކެތި އަތުލައިގެން އެވާހަކަ ހަބަރުތަކުން ޖާގަ ހޯދި އިރު އެ މުއްދަތުގައި ދުނިޔޭގެ 64 ގައުމެއް ގުޅިގެން ހިންގި އޮޕަރޭޝަނުގައި 1400 މެޓްރިކް ޓަނުގެ މަސްތުވާތަކެތި ކަނޑުމަތިން އަތުލިކަމަށް ބައިނަލްއަގުވާމީ މީޑިއާތަކުން ރިޕޯޓު ކޮށްފިއެވެ.
ކޮލަމްބިއާ އަށް ނިސްބަތްވާ އަދި ބައިނަލްއަގުވާމީ ފެންވަރުގައި އޮޕަރޭޓް ކުރާ ޑްރަގް ނެޓްވޯކަކުން ސްމަގްލް ކުރަމުން ދިޔަ މަސްތުވާތަކެތި އަތުލުގައި ދުނިޔޭގެ 64 ގައުމަކުން ބައިވެރިވެފައި ވެއެވެ. އޭގެ ތެރޭގައި ހުޅަނގާއި އެފްރިކާ އާއި ދެކުނު އިރުމަތީ އޭޝިއާ އާއި މެދުއިރުމަތީގެ އިތުރުން ލެޓިން އެމެރިކާގެ ބައެއް ގައުމުތައް ހިމެނެއެވެ.
މި އެންމެން ގުޅިގެން ހިންގި އޮޕަރޭޝަންގައި 1400 ޓަނު އަތުލައިގަތީ, ކޮލަމްބިއާ އިން އޮސްޓްރޭލިއާ އަށް ގެންދިޔަ މަގުމަތީގައެވެ. ނޮވެންބަރު 1 އިން 24 އަށް ހިންގި އޮޕަރޭޝަންގައި އެކި ދުވަސްމަތިން އެކި އަދަދުތަކުން އަތުލައިގަނެވުނު މަސްތުވާތަކެތީގެ ތެރޭގައި މެރިޖުއާނާ އާއި ކޮކެއިންގެ އިތުރުން އެހެން ބާވަތްތަކުގެ ޑްރަގްސްވެސް ފެނިފައިވާކަމަށް އޮފިޝަލުން ބުނެއެވެ.
އޮފިޝަލުން ބުނާގޮތުގައި އެ މޫސުމުގައި ނުވަތަ އެ މުއްދަތުގައި ދުނިޔޭގެ އެތަން މިނަތަށް ކުރަމުން ދިޔަ ޑްރަގް ސަޕްލައި ވަނީ ގިނަ ވެފައެވެ. އެގޮތުން ކަނޑުމަތީގެ އެތައް އޮޕަރޭޝަނެއް ހިންގާ އެކިއެކި ގައުމުތަކުން ވަނީ އެކުގައި މަސައްކަތް ކޮށް ކާމިޔާބީތަކެއް ހޯދާފައެވެ.
އެ މޫސުމުގައި ރާއްޖެއަށް ވަން ލަންކާގެ ބޯޓަކުން 400 ކިލޯގެ މަސްތުވާތެތި ދިވެހި ސަލާމަތީ ބާރުތަކުން ވަނީ އަތުލައިގެންފައެވެ. ހދ. މަކުނުދޫ ބޭރުން ފެނުނު ސްރީލަންކާގެ މަސްބޯޓެއް ހިފަހައްޓައި އެ ބޯޓުން 468.6 ކިލޯގެ މަސްތުވާތަކެތި ހޯދިއެވެ. އެ ބޯޓުން ފެނިފައިވަނީ 344 ކިލޯގެ މެތު އާއި 124.6 ކިލޯގެ ކޮކެއިންއެވެ.
