ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ ފުރަތަމަ އިސްލާމިކް ވިސާ ކްރެޑިޓް ކާޑު މިއަދު ތައާރަފްކޮށްފިއެވެ.
ބީއެމްއެލް އިން ބުނީ މި ކާޑަކީ ކަސްޓަމަރުންނަށް ހިދުމަތް ފޯރުކޮށްދިނުމުން އެއްބަސްވެފައިވާ ފީއެއް ނެގޭ ގޮތަށް އިސްލާމިކް ބޭންކިންގެ އުޖްރާ އުސޫލުން ފަރުމާކޮށްފައިވާ ކާޑެއް ކަމަށާއި، މި ކާޑުން ރާއްޖެ އާއި ރާއްޖެއިން ބޭރުން ވިޔަފާރި ކުރެވޭނެ ކަމަށެވެ.
މި ކާޑަކީ އެންމެ ފަހުގެ ސަލާމަތީ ފިޔަވަޅުތައް އެކުލެވޭ ކާޑެއް ކަން ފާހަގަކުރަމުން ބީއެމްއެލް އިން ބުނީ އިސްލާމިކް ވިސާ ކްރެޑިޓް ކާޑުގެ ކްލެސިކް، ގޯލްޑް، ޕްލެޓިނަމް އަދި ސިގްނޭޗާ ކާޑު ލިބެން ހުންނާނެ ކަމަށެވެ.
ބީއެމްއެލް އިން ބުނީ މި ކާޑު ބޭނުންކޮށްގެން ކަސްޓަމަރުންނަށް، ބީއެމްއެލް ރިވޯޑްސް ޕްރޮގްރާމްގައި ބައިވެރިވެ ކްރެޑިޓް ކާޑުން ކުރާ މުއާމަލާތްތަކަށް ޕޮއިންޓް ހޯދޭނެކަމަށާއި، ފްލައިޓް ޓިކެޓް، ކާރު ކުއްޔަށް ނެގުން، ހޮޓެލް ބުކިންތަކަށް ނުވަތަ ރާއްޖެ އާއި ރާއްޖެއިން ބޭރުގެ މާޗަންޓުންގެ ވައުޗާ ހޯދުމަށް ވެސް އެ ރިވޯޑް ޕޮއިންޓުތައް ބޭނުންކުރެވޭނެ ކަމަށެވެ.
ބީއެމްއެލް އިސްލާމިކް ބޭންކިންގެ ޑިރެކްޓާ ހަސަން ކަލާމް ވަނީ ބީއެމްއެލްގެ އަމާޒަކީ ދުނިޔޭގެ އެކި ހިސާބުތަކުގައި ފޯރުކޮށްދޭ ވިސާގެ ހިދުމަތްތަކާ އެއްހަމައެއްގައި އިސްލާމިކް ބޭންކިންގެ އުސޫލުތަކާ އެއްގޮތަށް ކަސްޓަމަރުންނަށް ހިދުމަތް ދިނުން ކަމަށް ވިދާޅުވެފައެވެ.
