ޖޯލި ރިސޯޓުގެ "ޖޯލި ބީއިން" ބައެއް ވިލާތައް ފަސް މިލިއަން ޑޮލަރު (77 މިލިއަން ރުފިޔާ) އަށް ވިއްކަން ނިންމައި ގަންނަން ޝައުގުވެރިވާ ފަރާތްތަކަށް ފުރުސަތު ހުޅުވާލައިފިއެވެ.
ޖޯލިން ހުޅުވާލީ ރާއްޖޭގައި ޕްރައިވެޓް ރެޒިޑެންސެއް ހޯދުމުގެ ފުރުސަތެވެ. ލާނާ އިންޓަނޭޝަނަލް އެއާޕޯޓުން ފުރައިގެން 40 މިނެޓުން ދެވޭ ހިސާބު ދުރުގައި އޮންނަ ޖޯލި ރިސޯޓުން މިކަން ކުރަނީ "އައިލެންޑް ހޯމްސް"ގެ ނަމުގައި ޕެކޭޖެއް ތައާރަފްކޮށްގެންނެވެ. އެ ރިސޯޓުގައި އެއް ކޮޓަރިން ފެށިގެން ހަތަރު ކޮޓަރިއާ ދެމެދުގެ ވިލާތައް ހުރެ އެވެ.
އޭގެ ތެރޭގައި ބީޗް އަދި ވޯޓާ ވިލާ ހިމެނެއެވެ. އެ ވިލާތަކުގައި 230-1،700 އަކަފޫޓުގެ ހުންނައިރު އެ ރިސޯޓުން އެންމެ ޒަމާނީ ވަސީލަތްތައް ލިބެން ހުރެއެވެ. ޖޯލި ބީއިން ރިސޯޓުގައި ވިއްކަން ހުޅުވާލި ހަތަރު ކޮޓަރީގެ ވިލާތަކުގައި 118 އަކަ މީޓަރުގެ އިންފިނިޓީ ޕޫލެއް ހުރެއެވެ.
އެ ރިސޯޓުން ބުނީ، ދިގު މުއްދަތަކަށް ދޫކޮށްލާ މި ވިލާތައް ގަންނަ ފަރާތްތަކަށް އެ ތަންތަން މެނޭޖުކޮށްދޭނީ ޖޯލި ރިސޯޓުން ކަމަށެވެ. ވެލްނެސްއަށް ހާއްސަކޮށް ހުޅުވާފައިވާ އެ ރިސޯޓުން ކުއްޔަށް ނަގާ ވިލާތަކުގެ މީހުންނަށް އެ ރިސޯޓުގެ ޓޫރިސްޓުންނަށް ހޯދޭ ހުރިހާ ހިދުމަތްތައް ވެސް ބޭނުން ކުރެވޭނެކަމަށް އެ ރިސޯޓުން ވަނީ ބުނެފައެވެ.
ޖޯލި ބީއިން ރިސޯޓު 68 ވިލާއާ އެކު ހުޅުވީ 2021 ވަނަ އަހަރުގައެވެ.
