ސަރުކާރުން ހުށަހެޅި ގޮތަށް، އިލެކްޝަންސް ކޮމިޝަނާއި އެންޓި-ކޮރަޕްޝަން ކޮމިޝަންގެ ވެރިން އައްޔަންކުރުމުގެ ސީދާ ބާރު ރައީސުލްޖުމްހޫރިއްޔާ އަށް ދޭން ފެންނަ ކަމަށް، ރައްޔިތުންގެ މަޖިލީހުން މިއަދު ފާސްކޮށްފިއެވެ.
އެ ދެ ކޮމިޝަންގެ ރައީސުންނާއި ނައިބުން ކަނޑައެޅުމުގެ ބާރު ސީދާ ރައީސުލްޖުމްހޫރިއްޔާ އަށް ދޭ ގޮތަށް ހެދުމަށް ސަރުކާރުން ރައްޔިތުންގެ މަޖިލީހަށް އިސްލާހެއް ހުށަހެޅީ މިދިޔަ މަހުގެ ފަހުކޮޅުގައެވެ. އަދި މި މަހުގެ 12 ވަނަ ދުވަހު މިނިވަން މުއައްސަސާތަކާ ބެހޭ ކޮމިޓީ އަށް މި އިސްލާހު ދިރާސާކުރަން ފޮނުވައި، މިދިޔަ ބުދަ ދުވަހު ކޮމިޓީން ނިންމީ ދެ އިސްލާހު ވެސް ފާސްކުރަން ފެންނަ ކަމަށެވެ.
އެހެންކަމުން ދެ އިސްލާހު ވެސް ފާސްކުރަން ފެނޭތޯ ރިޔާސަތުން ވަކިވަކިން ވޯޓަށް އެހުމުން، ދެ އިސްލާހު ފާސްކުރުމަށް 69 މެންބަރުން ވޯޓުދެއްވިއިރު، ދެ އިސްލާހު ފާސްކުރަން ނުފެންނަ ކަމަށް 10 މެންބަރުން ވޯޓުދެއްވާފައިވެއެވެ.
ސަރުކާރުން ހުށަހެޅި އިސްލާހުގައިވާ ގޮތުން:
- އީސީ އާއި އޭސީސީގެ ވެރިން އައްޔަންކުރަން ހުށަހަޅަން ވާނީ ދެ ކޮމިޝަންގައި ވެސް ތިއްބެވި މެންބަރުންގެ ތެރެއިން
- އެ ދެ ކޮމިޝަންގެ ވެރިންގެ މަގާމަށް އައްޔަންކުރެވޭނީ ރައީސުލްޖުމްހޫރިއްޔާ މަޖިލީހަށް ހުށަހަޅުއްވާ ބޭފުޅުންގެ ތެރެއިން މަޖިލީހުގެ ރުހުން ލިބޭ ބޭފުޅުންނަށް
- މިވަގުތު އެ ދެ ކޮމިޝަންގެ ވެރިންގެ ގޮތުގައި ތިއްބެވި ބޭފުޅުން މަގާމުން ވަކިވަންދެން އެ މަގާމުތަކުގައި ދެމިތިބެވޭނެ
އަދި މި އިސްލާހުތައް ތަސްދީގުކުރާ ދުވަހުން ފެށިގެން، އީސީ އާއި އޭސީސީގެ ވެރިންގެ އިސްތިއުފާގެ ސިޓީ ހުށަހަޅަން ޖެހޭނީ ވެސް ސީދާ ރައީސުލްޖުމްހޫރިއްޔާ އަށް ކަން މި އިސްލާހުތަކުގައި ވެއެވެ.
