މާލޭގެ ގެއަކަށް ފިރިހެނަކު ވައްދައި ބަރަހަނާކޮށް ފޭރުނު މައްސަލައެއްގައި ހިމެނޭ ތިން މީހުން އެއް އަހަރާއި 3 މަހަށް ޖަލަށްލުމަށް ކްރިމިނަލް ކޯޓުން ހުކުމް ކޮށްފިއެވެ.
މިދިޔަ ޖުލައި މަހުގެ 24 ވަނަ ދުވަހުގެ ވަގުތެއްގައި ދިލްބަހާރުމަގު މއ. މަސްފަންގޭގައި ހިނގި މި ހާދިސާއާއި ގުޅިގެން ދައުވާކޮށްފައި ވަނީ މއ. މަސްފަން، އުމުރުން 43 އަހަރުގެ އާއިޝަތު އަދި މއ. މަސްފަން، އުމުރުން 27 އަހަރުގެ މުހައްމަދު ރީހާންގެ އިތުރުން ސ. ހިތަދޫ / ސޯމާ، އުމުރުން 35 އަހަރުގެ ޝަފީގު އިބްރާހީމްގެ މައްޗަށެވެ.
ޕީޖީއިން މި 3 މީހުންގެ މައްޗަށް 3 ދައުވާއެއް އުފުލާފައިވެއެވެ. އެގޮތުން މީހަކަށް އަނިޔާއެއް ދިނުމުގެ ދައުވާ، އެނގިހުރެ ހުއްދަނޫން ގޮތެއްގައި މައުލޫމާތު ހޯދުމުގެ ދައުވާގެ އިތުރުން ފޭރުމުގެ ދައުވާ ހިމެނެއެވެ. ކްރިމިނަލް ކޯޓުން ނެރުނު ހުކުމުގައި ބުނެފައިވަނީ އެމީހުން ފޭރިގެންފައިވަނީ އެ ފިރިހެން މީހާގެ ކޭޝް ކާޑުން 25،000 ރުފިޔާގެ އިތުރުން އިންޓަނެޓް ބޭންކިން މެދުވެރިކޮށް 20،000 ރުފިޔާ ކަމަށެވެ.
މި މައްސަލައިގެ ޝަރީއަތުގެ އަޑުއެހުމުގައި އެ ތިން މީހުން ވެސް ކުށަށް އިއުތިރާފުވެފައިވާއިރު، ކްރިމިނަލް ކޯޓުން ކުރި ހުކުމުގައި ވަނީ އާއިޝަތު 10 މަހާއި 6 ދުވަހަށް، ރީހާން 10 މަހާއި 5 ދުވަހަށް އަދި ޝަފީގު އެއް އަހަރާއި އެއް މަހާއި 12 ދުވަހަށް ޖަލަށް ލުމަށް ހުކުމްކޮށްފައެވެ. މި ގޮތަށް ހުކުމް ކޮށްފައިވަނީ އެމީހުން ބަންދުގައި ހޭދަކުރި މުއްދަތު އުނިކުރުމަށްފަހުއެވެ.
