އިންތިހާބުވާ ޕާޓީ ބަދަލުކުރުމުން އެ މީހަކު ރައްޔިތުންގެ މަޖިލީހުގެ މެންބަރުކަމުން ވަގުތުން ވަކިވާގޮތަށް ގާނޫނުއަސާސީ އިސްލާހުކުރުމުގެ މަސައްކަތް އެއް ދުވަހުގެ ތެރޭ ނިންމަން މަޖިލީހުން ހިފައިފިއެވެ.
ހުޅުދޫ ދާއިރާގެ މެންބަރު އަދި ޕީއެންސީގެ ޑެޕިއުޓީ ލީޑަރު މުހައްމަދު ޝާހިދު ގާނޫނުއަސާސީ އަށް ހުށަހެޅުއްވި އެ އިސްލާހު މަޖިލީހަށް މިއަދު ހުށަހަޅައި އެ އިސްލާހަށް މެންބަރުން ބަހުސްކޮށް ނިންމާލުމަށް ފަހު، އެ އިސްލާހު ދިރާސާކުރުމަށްޓަކައި މުޅި މަޖިލީހުގެ ކޮމިޓީއަށް ވަނީ މީގެ ކުޑައިރުކޮޅެއް ކުރިން ފޮނުވާލައިފައެވެ.
12:30 ގައި ކޮމިޓީގެ ބައްދަލުވުން އޮންނާނެ ކަމަށް، ހެނދުނުގެ ޖަލްސާ ނިންމަވާލައްވަމުން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވިއެވެ.
ރައްޔިތުންގެ މަޖިލީހުގެ ވެބްސައިޓުން ދައްކާގޮތުން މި އިސްލާހު ފާސްކުރުމަށްޓަކައި މިއަދު ހަވީރު 5:30 އަށް ޖަލްސާއެއް ވެސް ވަނީ ތާވަލުކޮށްފައެވެ.
ޝާހިދު ހުށަހެޅުއްވި އިސްލާހު ފާސްވެއްޖެނަމަ، މި ތިން ހާލަތުން ކުރެ އެއް ހާލަތަކުން މަޖިލީހަށް އިންތިހާބުވާ މެންބަރުން ވަކިވާނެއެވެ. އެއީ:
- ވަކި ޕާޓީއަކުން ވާދަކޮށް މެންބަރުކަމަށް އިންތިހާބުވާ ފަހުން އެ މެންބަރަކު އެ ޕާޓީއަކުން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުން
- އެ މެންބަރަކު މިހާރު ތަމްސީލުކުރާ ޕާޓީން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުން
- އަމިއްލަގޮތުން ވާދަކޮށް އިންތިހާބުވާ މެންބަރުން ސިޔާސީ ޕާޓީއަކާ ގުޅުމުން
ސަރުކާރުން ގާނޫނުއަސާސީ އަށް މި އިސްލާހު ހުށަހެޅީ، ބެލެވޭ ގޮތުގައި މިހާރު އަމަލުކުރަމުންދާ އެންޓި-ޑިފެކްޝަން ގާނޫނުގެ ބަދަލުގައި، އެ ގާނޫނުގައިވާ މާއްދާތައް ސީދާ ގާނޫނުއަސާސީގައި ހިމެނުމަށެވެ.
މީގެ އިތުރުން ވެސް ޝާހިދު ހުށަހެޅުއްވި އިސްލާހު ފާސްވެއްޖެނަމަ:
- ގައުމީ ތަރައްގީގެ ޕްލޭންތަކާއި ތަސައްވުރުތައް އެކުލަވާލުމުގެ ބާރުތައް ރައީސުލްޖުމްހޫރިއްޔާ އަށް ލިބޭނެ
- މަޖިލީހުގެ ފުރިހަމަ އަޣުލަބިއްޔަތުން ފާސްވެގެން ނޫނީ އަސްކަރީ ބޭނުމަކަށް ރާއްޖޭގައި އެއްވެސް ސަރަހައްދެއްގައި ބޭރުގެ ސިފައިންނަށް ހަރަކާތްތެރިވުމުގެ ފުރުސަތު ނުދެވޭނެ
