ގުދުތަރީ ކާރިސާ ތަކަށް އިޖާބަދީ ރައްޔިތުންނަށް ހިދުމަތް ކުރުމުގައި ސްޓެލްކޯގެ މުވައްޒަފުންގެ ޒިންމާ ދާރު މަސައްކަތް ފާހަގަކޮށް އެމްޑީ ހުސައިން ފަހުމީ ހާއްސަ ޝުކުރެއް އަދާކޮށްފިއެވެ.
ފަހުމީ މިހެން ވިދާޅުވީ، ރާއްޖެއަށް ކުރަމުންދާ ވިއްސާރައިގައި އދ. އޮމަދޫގެ ފެންބޮޑުވާ މަގުތަކުގެ ފެން ހިންދުމުގެ ގޮރުން ސްޓެްކޯގެ މުވައްޒަފުން ނިކުމެ ޖަންކްޝަން ހެދުމުގެ މަސައްކަތް ކުރިއަށް ގެންގޮސްފައިވުމުންނެވެ.
ފަހުމީ ވިދާޅުވީ، މި ގައުމުގެ ރައްޔިތުންނަށް ހިދްމަތް ކުރުމުގައި، މުވައްޒަފުން ކުރަމުންދާ ކޮންމެ މަސައްކަތެއްގައި ސާބިތުކަން ފެނިވަޑަިއގަންނަވާ ކަމަށެވެ. ފެންބޮޑުވުމާއި، ގުދުރަތީ ކާރިސާތަކަށް އިޖާބަދިން ކަމުގައި ވިޔަސް، ނުވަތަ އެނޫން ވެސް ގޮންޖެހުންތަކަށް އިޖާބަދިން ކަމުގައި ވިޔަސް، ސްޓެލްކޯގެ މުވައްޒަފުން އަބަދުވެސް ދައްކައިދެނީ ކެތްތެރިކަމާއި އޯގާތެރިކަމާއި ޒިންމާދާރުކަމުގެ ވަރުގަދަ އިހުސާސެއް ކަމަށް ފަހުމީ ވިދާޅުވިއެވެ.
ނާޒުކު ދަނޑިވަޅެއްގައި، ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް، ކުރިއަށް ދިއުމަށް ޝައުޤުވެރި ވުމަކީ، މުވައްޒަފުންގެ އިހްލާސްތެރި ކަމާއި، ޕްރޮފެޝަނަލިޒަމް ދައްކުވައިދޭ ކަމެއްގެ ގޮތުގައި ފަހުމީ ފާހަގަކުރެއްވިއެވެ.
ސްޓެލްކޯގެ އަމާޒަކީ ހަކަތަ ފޯރުކޮށްދިނުމުގެ މަސައްކަތުގެ އިތުރަށް މި މުޖުތަމައު އަށް ފައިދާ ވާ މަސައްކަތްތައް ކުރުމުގައި ދެމި ތިބުން ކަމަށް ފަހުމީ ވިދާޅުވިއެވެ. ސްޓެލްކޯ ޓީމުގެ ކޮންމެ މެންބަރަކު ވެސް ބުރަ މަސައްކަތާއި، އަމިއްލަ އެދުމެއް ރައްޔިތުންނަށް ދޭ ހިދުމަތަކީ، ސަމާލުކަން ނުލިބި ދާނެ ކަމެއް ނޫން ކަމަށާއި އެ ހިދުމަތަކީ އަގު ވަޒަންކުރެވޭ ކަމެއްގެ ގޮތުގައި ފަހުމީ ވިދާޅުވިއެވެ. މި މުޖުތަިމައު ހަރުދަނާ ކުރުމަށް އިތުބާރު ހިފޭ ވަސީލަތަކަށް އެ މުވައްޒަފުން ދައްކާ ނަމޫނާ ފާހަގަކޮށް ފަހުމީ ވަނީ ހާއްސަ ޝުކުރެއް އަދާކުރައްވާފައެވެ.
