ސަރުކާރުގެ ފުރިހަމަ ބާރު ނޫސްވެރިކަމަށް ފޯރުވޭގޮތަށް ފަރުމާކޮށް މަޖިލީހަށް ހުށަހެޅި މީޑިއާ އެންޑް ބްރޯޑްކާސްޓިން ކޮމިޝަންގެ ބިލު އަނބުރާ ގެންގޮސްފިއެވެ.
މީގެ ހަފްތާއެއްގެ ކުރިން އަމިއްލަ މެންބަރު އަބްދުލްހަންނާން ހުށަހެޅުއްވި ބިލުގައިވާ ގޮތުން، މީޑިއާ ކައުންސިލާއި ބްރޯޑްކާސްޓިން ކޮމިޝަންގެ ބަދަލުގައި މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފެދޭނެއެވެ. މި ކޮމިޝަން އެކުލެވިގެން ވަނީ ހަތް މެންބަރުންގެ މައްޗަށް ކަމަށާއި އެއީ ރައްޔިތުންގެ މަޖިލީހުގެ ރުހުން ލިބިގެން ރައީސް އައްޔަން ކުރައްވާ ހަތަރު މެންބަރުންނާއި، މީޑިއާތަކުން އިންތިހާބު ކުރާ ތިން މެންބަރުން ކަމަށް ބިލުގައި ބުނެފައި ވެއެވެ.
ހަމައެއާއެކު އެ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރު ވެސް ދީފައި އޮތީ ރައީސަށެވެ. ރައީސް އެ ދެ މަގާމަށް ބޭފުޅުން ހަމަޖައްސަން ޖެހެނީ ކޮމިޝަންގެ މެންބަރުންގެ ތެރެއިން، މަޖިލީހުގެ ރުހުމާ އެކުއެވެ.
ބްރޯޑްކާސްޓް ކުރުމުގެ ހިދުމަތް ދިނުމުގެ ލައިސަންސް ލިބިފައިވާ ފަރާތްތަކާއި ނޫސްތަކުން ކޮމިޝަނުން ކަނޑައަޅާ ސުލޫކީ މިންގަނޑަކާ ހިލާފުވެއްޖެ ނަމަ އެޅޭނެ ފިޔަވަޅުތައް ވެސް ބިލުގައި ބަޔާންކޮށްފައި ވެއެވެ. އޭގެ ތެރޭގައި ތަކުރާރުކޮށް ގާނޫނާއި ގަވައިދާ ހިލާފުވަމުންދާ ނަމަ، ދޫކޮށްފައިވާ ބްރޯޑްކާސްޓިން ލައިސެންސް ނުވަތަ ނޫސް މަޖައްލާއެއް ނަމަ ދޫކޮށްފައިވާ ރަޖިސްޓްރީ ބާތިލުކުރުމަށް ކޯޓަށް ހުށަހެޅުމަށް ފަހު، ކޯޓުން ނިންމާ ގޮތެއްގެ މަތިން ލައިސެންސް ނުވަތަ ރަޖިސްޓްރީ ބާތިލުކުރެވޭނެއެވެ.
މި ބިލު އަނބުރާ ގެންގޮސްފައިވާ ކަމަށް 'ދަ ޕްރެސް' އިން ސުވާލުކުރުމުން އޭނާ ވިދާޅުވިއެވެ.
އަބްދުލްހަންނާން އެ ބިލު ނަންގަވާފައި ވަނީ މީޑިއާ އެންޑް ބްރޯޑްކާސްޓިން ކޮމިޝަންގެ ބިލަށް ސަރުކާރުން ތާއީދުނުކުރާ ކަމަށާއި މަޖިލީހުން އެ ބިލު ބޭރުކުރާނެ ކަމަށް، ރައީސް ޑރ. މުހައްމަދު މުއިއްޒު ވިދާޅުވެފައި ވަނިކޮށެވެ.
ބިލާ ގުޅިގެން ނޫސްވެރިންގެ މެދުގައި ހުރި ކަންބޮޑުވުންތައް، ނޫސްވެރިންގެ ޖަމިއްޔާ އެމްޖޭއޭ އިން ވަނީ މިދިޔަ އާދީއްތަ ދުވަހު ބަންޑާރަނައިބު އަހްމަދު އުޝާމަށާއި ޔޫތު މިނިސްޓަރު އިބްރާހީމް ވަހީދަށާއި ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހީމް ޚަލީލާ ހިއްސާކޮށްފައެވެ. ބަންޑާރަނައިބު ވަނީ އެ ބިލާ ގުޅިގެން ނޫސްވެރިންގެ މެދުގައި ހުރި ކަންބޮޑުވުންތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ވެސް އެ ދުވަހު ދެއްވައިފައެވެ.
