އެމެރިކާގެ ހަތިޔާރުން ރަޝިއާގެ ތެރެއަށް ހަމަލާ ދިނުމުގައި ގެންގުޅުނު ހިފެހެއްޓުންތައް ދޫކޮށްލައި ދުރުތާސްތާ މިސައިލުން ރަޝިއާ އަށް ހަމަލާ ދޭން އެމެރިކާއިން ހުއްދަ ދީފިއެވެ.
ވެރިކަން ނިމެމުން ދާ ޖޯ ބައިޑަން ހުއްދަ ދެއްވާފައި މިސައިލަކީ، އެމެރިކާގެ ސެޓެލައިޓް ތަކުގެ އެހީގައި މިސްރާބު ދައްކައިގެން ބޭނުން ކުރާ މިސައިލްތަކެކެވެ. 190 މޭލު ނުވަތަ 300 ކިލޯމީޓަރުގެ ރާސްތާއެއް ލިބިފައިވާ އެންމެ ޒަމާނީ އެޓަކަމްސް ނުވަތަ އާމީ ޓެކްޓިކަލް މިސައިލް ސިސްޓަމް ބޭނުން ކުރަން ފަށައިފި ނަމަ ރަޝިއާގެ އެތެރޭގެ ނާޒުކު މަގާމުތަކަކަށް ޔޫކްރައިން އަށް ހަމަލާ ދެވޭނެއެވެ.
ހަބަރުތައް ބުނާގޮތުން އެ މިސައިލްގެ ރާސްތާ ފޯރާ ހިސާބުގައި ރަޝިއާގެ އަސްކަރިއްޔާގެ 290 މަގާމެއް ވެއެވެ. އެހެން ކަމުން އެ މިސައިލާއެކު ހަނގުރާމަ އާ ހަރުފަތަކަށް ދާނެ ކަމަށް މުރާސިލުން ބުނެއެވެ.
އެމެރިކާގެ ރައީސް ބައިޑަން ގެ މި ނިންމެވުމާއެކު ރަޝިއާއިން ބުނެފައި ވަނީ، އެއީ އެމެރިކާއިން ޔޫކްރައިން ހަނގުރާމައިގެ ތެރެއަށް ސީދާ ވަނުން ކަމަށާއި، އެއްވަރުގެ ރައްދެއް ދޭނެ ކަމަށެވެ.
ބައިޑަން މި ގޮތަށް ނިންމެވި އިރު އެމެރިކާއިން ވަނީ ރަޝިއާ އަށް އެ މިސައިލް ވެސް ފޯރުކޮށް ދީފައެވެ. ނަމަވެސް މިއޮއްހާ ދުވަހު އެ ބޭނުން ކުރުމުގެ ހުއްދަ ނުދޭތީ، އެކަން ވަނީ ނުކުރެވިފައެވެ.
ބައިޑަންގެ މި ނިންމެވުމާ ގުޅިގެން އެމެރިކާގެ އޮފިޝަލުން އިތުރު ވާހަކައެއް ދައްކަވާފައި ނުވާ އިރު، އާ ރައީސް ޑޮނަލްޑް ޓްރަމްޕް ވެސް އެކަމާ ގުޅޭގޮތުން އަދި އެއްޗެއް ވިދާޅުވެފައެއް ނުވެއެވެ. ރައީސް ކަމުގެ ހުވާ ކުރެއްވުމަށް ޓްރަމްޕަށް އަދި ކުޑަ ދުވަސްކޮޅެއް އޮތުމުން ބައިޑަންގެ ނިންމެވުމާ މެދު އެއްޗެއް ވިދާޅުވެފައި ނުވި ނަމަވެސް، ރިޔާސީ ކެމްޕެއިންގެ ތެރޭގައި ޓްރަމްޕް ވަނީ ޔޫކްރައިން ހަނގުރާމަ 24 ގަޑިއިރުގެ ތެރޭގައި ހުއްޓުވާނެ ކަމަށް ވިދާޅުވެފައެވެ. އަދި ޓްރަމްޕްގެ ނައިބު ޖޭޑީ ވޭންސް ވެސް ވިދާޅުވެފައި ވަނީ ޓްރަމްޕްގެ ސަރުކާރުގެ ވިސްނުމަކަށް ވާނީ ޔޫކްރައިން އެއްބަސް ކުރުވައި ރަޝިއާއިން ހިފި ޔޫކްރައިންގެ ސަރަހައްދުތައް ރަޝިއާ އަށް ދޫކޮށްލުމާއެކު ހަނގުރާމަ ހުއްޓުވުން ކަމަށެވެ.
އެމެރިކާއިން ދުރުރާސްތާގެ މިސައިލް ބޭނުން ކުރުމުގެ ހުއްދަ ޔޫކްރައިން އަށް ދިން އިރު ޔޫރަޕްގެ ގައުމުތައް ކަމަށް ވާ ފްރާންސާއި އިނގިރޭސިވިލާތުގައި ބޭނުން ކުރާ އެހާވަރުގެ ރާސްތާ ހުރި މިސައިލް ވެސް ޔޫކްރައިންގައި އެބަހުއްޓެވެ.
