މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޯޑްކާސްޓިން ކޮމިޝަން އުވާލައި 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން'ގެ ނަމުގައި އާ ކޮމިޝަނެއް އުފައްދަން ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލް މަޖިލީހުން ބޭރުކުރަން ގޮވާލާ ޕެޓިޝަން ހަދަން ފަށައިފިއެވެ.
މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގައި މި ޕެޓިޝަންގައި ނޫސްވެރިން ސޮއިކުރުން މިހާރު ދަނީ ކުރިއަށެވެ. މި ޕެޓިޝަނުގައި ބުނެފައިވާ ގޮތުން މި ބިލާ އެއްގޮތަށް މީޑިއާގެ ރެގިއުލޭޓަރީ ނިޒާމު އިންތިޒާމުވެގެން ދިއުމަކީ ރާއްޖޭގެ ނޫސްވެރިކަމުގެ މިނިވަންކަން އެތައް އަހަރެއް ފަހަތަށް ސޮއްސާލައިގެން ގޮސް ބައިނަލް އަގުވާމީ ނޫސްވެރިކަމުގައި ރާއްޖެ އެތައް ދަރަޖައެއް ފަހަތަށް ދާނެ ކަމެކެވެ.
ނޫސްވެރިންކަމާއި މީޑިއާތައް ރެގިއުލޭޓް ކުރަން ސަރުކާރުގެ ބާރުގެ ދަށަށް ގެނައުމަކީ އެ ޖަމްއިއްޔާއިން އެއްވެސް މިންވަރަކަށް ބަލައިގަންނާނެ ކަމެއް ނޫންކަން ފާހަގަކޮށް އެމްޖޭއޭއިން ބުނީ އެކަމާ ދެކޮޅަށް އެ ޖަމިއްޔާއިން މަސައްކަތް ކުރާނެ ކަމަށެވެ. އަދި ބިލް ހުށަހެޅުއްވި މެންބަރު ވެސް އަދި ސަރުކާރުގެ ފަރާތުން ވެސް ބިލް އެކުލަވާލުމުގައި އެ ޖަމްއިއްޔާގެ އަދި މީޑިއާގެ އިސް ފަރާތްތަކުގެ ލަފާ އެއްވެސް ވަރަކަށް ހޯދާފައި ނުވާކަން އެ ޖަމިއްޔާއިން ވަނީ ފާހަގަކޮށްފައެވެ.
އެހެންކަމުން ގާނޫނު އަސާސީ އިން ކަށަވަރުކޮށްދޭ ހިޔާލު ފާޅުކުރުމުގެ މިނިވަންކަމާއި، ނޫސްވެރިކަމުގެ ހައްގުގެ މިނިވަންކަންވެސް ގެއްލޭނެކަން ފާހަގަކޮށް ޕެޓިޝަނުގައި ވަނީ މި ބިލް މަޖިލީހުން ބޭރުކޮށްލުމަށް މަޖިލީހުގެ މެމްބަރުންނަށް ގޮވާލާފައެވެ.
މަޖިލިސް ޖަލްސާއަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު ހުށަހެޅުއްވީ، ސަރުކާރުގެ ކަންކަމަށް ތާއީދު ކުރައްވަމުން ގެންދަވާ ނަމަވެސް ވަކި ޕާޓީއަކަށް ނިސްބަތްވެވަޑައިނުގަންނަވާ ތުޅާދޫ ދާއިރާގެ މެންބަރު އަބްދުލްހައްނާނެވެ.
އެ ބިލުގައިވާ ގޮތުން، ބިލު ގާނޫނަކަށްވެ، އަމަލު ކުރަން ފެށުމާ އެކު އެމްއެމްސީ އާއި ބްރޯޑްކޮމްގެ މަސްއޫލިއްޔަތުތައް އަދާ ކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފެދޭނެއެވެ. މި ކޮމިޝަން އެކުލެވިގެން ވަނީ ހަތް މެންބަރުންގެ މައްޗަށް ކަމަށާއި އެއީ ރައްޔިތުންގެ މަޖިލީހުގެ ރުހުން ލިބިގެން ރައީސް އައްޔަން ކުރައްވާ ހަތަރު މެންބަރުންނާއި، މީޑިއާތަކުން އިންތިހާބު ކުރާ ތިން މެންބަރުންކަމަށް ބިލުގައި ބުނެފައި ވެއެވެ. ހަމައެއާއެކު އެ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރު ވެސް ދީފައި ވަނީ ރައީސަށެވެ. ރައީސް އެ ދެ މަގާމަށް ބޭފުޅުން ހަމަޖައްސަން ޖެހެނީ ކޮމިޝަންގެ މެންބަރުންގެ ތެރެއިން، މަޖިލީހުގެ ރުހުމާ އެކުއެވެ.
ބްރޯޑްކާސްޓް ކުރުމުގެ ހިދުމަތް ދިނުމުގެ ލައިސެންސް ލިބިފައިވާ ފަރާތްތަކާއި ނޫސްތަކުން ކޮމިޝަނުން ކަނޑައަޅާ ސުލޫކީ މިންގަނޑަކާ ހިލާފުވެއްޖެ ނަމަ އެޅޭނެ ފިޔަވަޅުތައް ވެސް ބިލުގައި ބަޔާންކޮށްފައި ވެއެވެ. އޭގެ ތެރޭގައި ތަކުރާރުކޮށް ގާނޫނާއި ގަވައިދާ ހިލާފުވަމުންދާ ނަމަ، ދޫކޮށްފައިވާ ބްރޯޑްކާސްޓިން ލައިސެންސް ނުވަތަ ނޫސްމަޖައްލާއެއް ނަމަ ދޫކޮށްފައިވާ ރަޖިސްޓްރީ ބާތިލުކުރުމަށް ކޯޓަށް ހުށަހެޅުމަށް ފަހު، ކޯޓުން ނިންމާ ގޮތެއްގެ މަތިން ލައިސެންސް ނުވަތަ ރަޖިސްޓްރީ ބާތިލުކުރެވޭނެއެވެ.
