އަމިއްލަ މެންބަރު އަބްދުލްހަންނާން ހުށަހަޅުއްވާފައިވާ މީޑިއާ އެންޑް ބްރޯޑްކާސްޓިން ކޮމިޝަނުގެ ބިލުގައި ހުރި އިސްލާހުތަކާ މެދު ކަންބޮޑުވުން ފާޅުކުރައްވައި ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށަހެޅުއްވި ކުއްލި މައްސަލައިގެ ޝަރުތު ފުރިހަމަނުވާ ކަމަށް ނިންމައި އެޖެންޑާނުކުރަން ރިޔާސަތުން ނިންމައިފިއެވެ.
ރައްޔިތުންގެ މަޖިލީހުގެ ގަވައިދުގެ 197 ވަނަ މާއްދާގައިވާ ގޮތުން، މަޖިލީހަށް ހުށަހަޅާފައިވާ ބިލެއް ނުވަތަ މައްސަލައަކާ ގުޅިގެން ހިނގާނެ ބަހުސަކާ ގުޅޭގޮތުން ކުރިއާލާ އެއްޗެއް ބުނުމަށް ކުއްލި މައްސަލަ ހުށަނޭޅޭނެއެވެ.
މީކާއީލް ހުށަހެޅުއްވި ކުއްލި މައްސަލައިގައި ވިދާޅުވީ، މީޑިއާ އެންޑް ބްރޯޑްކާސްޓިން ކޮމިޝަންގެ ބިލު ފަރުމާކޮށްފައި ވަނީ ނޫސްވެރިންނާއި މީޑިއާތައް ރެގިއުލޭޓްކުރުމުގެ ބާރު ސަރުކާރަށް ފުރިހަމައަށް ލިބޭގޮތަށް ކަމަށެވެ. އެހެންކަމުން އެ މަސައްކަތް ހުއްޓާލުމަށް ސަރުކާރަށާއި މަޖިލީހަށް އޭނާ ގޮވާލެއްވިއެވެ.
މި ބިލާ ގުޅޭގޮތުން މީޑިއާތަކުގެ އިސްވެރިންނާއި ނޫސްވެރިންގެ ޖަމިއްޔާތަކުން ކަންބޮޑުވުން ފާޅުކޮށްފައިވެއެވެ.
އިއްޔެ ހަވީރު ކުރެއްވި ޕޯސްޓެއްގައި ރައީސް ޑރ. މުހައްމަދު މުއިއްޒު ވިދާޅުވީ، މީޑިއާތައް ކޮންޓްރޯލްކުރުމުގެ ވިސްނުމެއް ސަރުކާރުގައި ނެތް ކަމަށެވެ.
