ދިވެހިރާއްޖޭގެ މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލުމަށް ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.
މި ބިލު ހުށަހެޅުއްވި ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ބިލު ހުށަހެޅުއްވި ސަބަބެއް ކަމަށް ވިދާޅުވީ، ރާއްޖޭގެ ނޫސްވެރިކަމުގެ މިނިވަންކަން ކުރިއަރުވައި ރެގިއުލޭޓުކުރުމާ އެކު، ނޫސްވެރިންނަށް ލިބިދީފައިވާ ހައްގުތައް ކަށަވަރުކޮށް، މީޑިއާތަކާއި ނޫސްވެރިންނާއި އެހެނިހެން ފަރާތްތަކުން އަމަލުކުރާނެ ހަމަތައް ކަނޑައެޅުމުގެ ގޮތުން ކަމަށެވެ.
މި ބިލު ގާނޫނަކަށް ވެއްޖެ ނަމަ ނޫސް މަޖައްލާތައް ރަޖިސްޓްރީކުރުމަށް ހަރުދަނާ މިންގަނޑުތައް ތައާރަފްވެގެން ދާނެ ކަމަށް، ބިލުގެ ބަޔާނުގައި ވިދާޅުވެފައިވެއެވެ.
ރައްޔިތުންގެ މަޖިލީހަށް މާދަމާ ހުށަހަޅާ މި ބިލު ގާނޫނަކަށް ވެއްޖެ ނަމަ، އެ ގާނޫނަށް އަމަލުކުރަން ފަށާ ތާރީހުގައި މިހާރު އޮތް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވި، ސީދާ އެއް ކޮމިޝަނަކަށް ބަދަލުވެގެން ދާނެއެވެ. އަދި ކޮމިޝަން އެކުލަވާލައި މެންބަރުން ކޮމިޝަން ހިންގުމާ ހަވާލުވުމާ ހަމައަށް ކޮމިޝަންގެ ކަންކަން ވަގުތީގޮތުން ހިންގާނީ ސިވިލް ސާވިސް ކޮމިޝަނުން އެކުލަވާލާ ފަސް މެންބަރުންގެ ވަގުތީ ކޮމިޓީއަކުން ކަމަށް ވެސް ބިލުގައި ވެއެވެ.
ބިލުގައިވާ ގޮތުން އެއްކޮށްލާފައިވާ ކޮމިޝަން އެކުލެވިގެން ވަނީ ހަތް މެންބަރުންގެ މައްޗަށެވެ. އެއީ:
- މަޖިލީހުން ރުހުންލިބިގެން ރައީސް އައްޔަންކުރައްވާ ހަތަރު މެންބަރުން
- މީޑިއާތަކުން އިންތިހާބުކުރާ ތިން މެންބަރުން
މި ހަތް މެންބަރުންގެ ތެރެއިން ކޮންމެ މެންބަރަކަށް ވެސް އަދާކުރެވޭނީ އެންމެ ގިނަވެގެން ފަސް އަހަރުގެ ދެ ދައުރު ކަމަށް ވެސް، ބިލުގައި ވެއެވެ.
ބިލުގައިވާ ގޮތުން ނަމަ، އާ ކޮމިޝަންގެ ރައީސާއި ނައިބު ރައީސް އައްޔަންކުރުމުގެ އެންމެހާ ބާރުތައް ވެސް ލިބިދީފައިވަނީ ސީދާ ރައީސުލްޖުމްހޫރިއްޔާ އަށެވެ. މިގޮތުން ރައީސުލްޖުމްހޫރިއްޔާ މަޖިލީހަށް ހުށަހަޅާ މެންބަރުންނަށް މަޖިލީހުން ރުހުންދިނުމުން، އާ ކޮމިޝަންގެ ރައީސް ކަމަށާއި ނައިބު ރައީސް ކަމަށް އެ މެންބަރުން އައްޔަންކުރައްވަން ވާނެ ކަމަށް، ބިލުގައި ވެއެވެ.
އަދި ކޮމިޝަންގެ މެންބަރަކު އިސްތިއުފާ ދޭން ބޭނުންވެއްޖެ ނަމަ، އިސްތިއުފާގެ ސިޓީ ހުށަހަޅަން ޖެހޭނީ ސީދާ ރައީސުލްޖުމްހޫރިއްޔާ އަށް ކަމަށް ވެސް ބިލުގައި ބަޔާންކޮށްފައިވެއެވެ.
ހަމަ އެއާއެކު މި ބިލު ގާނޫނަކަށް ވާ ހިސާބުން ފެށިގެން ރަޖިސްޓްރީނުކޮށް ރާއްޖޭގައި ނޫސް މަޖައްލާ ހިންގުން މަނާވާނެއެވެ.
