"ޝޭޑްސް އޮފް މައިންޑް" އާޓް އެގްޒިބިޝަން ނައިބު ރައީސް ހުސައިން މުހައްމަދު ލަތީފް ހުޅުއްވައިދެއްވައިފިއެވެ.
މި އާޓް އެގްޒިބިޝަން އަކީ ދުނިޔޭގެ ނަފްސާނީ ސިއްހަތުގެ ދުވަހުގެ މުނާސަބަތުގައި ޔޫތް މިނިސްޓްރީ އިން އިންތިޒާމްކޮށް ކުރިއަށް ގެންދާ އެގްޒިބިޝަން އެކެވެ.
މި އެގްޒިބިޝަން ހުޅުއްވައިދެއްވުމުގެ ގޮތުން އެގްޒިބިޝަންގައި ބަހައްޓާފައިވާ ފޮޓޯތައް ހިމެނޭ ކެޓަލޮގެއް ނައިބު ރައީސަށް ވަނީ އަރުވާފައެވެ.
މި އާޓް އެގްޒިބިޝަން ކުރިއަށް ގެންދިއުމަށް ހަމަޖެހިފައިވަނީ މި ހިނގާ ނޮވެންބަރު މަހުގެ 12 ވަނަ ދުވަހުން ފެށިގެން 17 ވަނަ ދުވަހުގެ ނިޔަލަށް ކަމަށް ޔޫތް މިނިސްޓްރީ އިން ވަނީ ބުނެފައެވެ.
ނޭޝަނަލް އާޓްގެލަރީގައި ބާއްވާ މި އެގްޒިބިޝަންގައި ފަންނުވެރިންގެ މަސައްކަތްތައް ވިއްކައިގެން އާމްދަނީ އެފަރާތްތަކަށް ލިބޭނެ ކަމަށާއި އެގްޒިބިޝަންގެ ތާރީހުތަކުގައި އާޓް ގެލެރީއަށް ހިލޭ ވަދެވޭނެ ކަމަށް ވެސް ޔޫތް މިނިސްޓްރީ އިން ވަނީ ބުނެފައެވެ.
ނަފްސާނީ ސިއްހަތުގެ ދުވަހާ ގުޅިގެން މިނިސްޓްރީގެ ފަރާތުން އާޓް އެގްޒިބިޝަނެއް ހުޅުވާލުމުގެ މައިގަނޑު މަގުސަދަކީ، ފަންނުވެރިކަމުގެ ތެރެއިން ނަފްސާނީ ހޭލުންތެރިކަން އިތުރުކުރުމާ ނަފްސާނީ ދުޅަހެޔޮކަމުގެ މުހިއްމުކަން ގެނެސްދިނުން ކަމަށް އެ މިނިސްޓްރީ އިން ވަނީ ބުނެފައެވެ.
