ދިވެހިރާއްޖެ އާއި ތުރުކީއާ ދެމެދު ވިޔަފާރީގެ ގުޅުން އިތުރަށް ހަރުދަނާ ކުރުމަށް މިނިވަން ވިޔަފާރީގެ އެއްބަސްވުމެއްގައި މިއަދު ސޮއި ކޮށްފިއެވެ.
މިއީ ރައީސުލްޖުމްހީރިއްޔާ، ޑރ. މުހައްމަދު މުއިއްޒު ތުރުކީ ވިލާތަށް މިދިޔަ ނޮވެމްބަރު މަހު ކުރެއްވި ދަތުރުފުޅުގެ ތެރެއިން ދެ ގައުމުގެ ގުޅުން ބަދަހި ކުރުމަށް މަޝްވަރާ ކުރެއްވި ކަންތަކުގެ ތެރޭގައި ހިމެނޭ ކަމަކެވެ.
ރައީސްގެ އެ ދަތުރުފުޅުގައި ތުރުކީގެ ރައީސް، ރަޖަބު ތައްޔިބް އުރުދުޣާން އާއި ބައްދަލު ކުރައްވާ، ދެ ގައުމުގެ އިގްތިސާދީ ގުޅުން ވަރުގަދަ ކުރުމުގެ އިތުރުން ވިޔަފާރި، އިގްތިސާދީ، އިންވެސްޓްމަންޓް، އިއާދަ ކުރަނިވި ހަކަތަ އަދި މަތީ ތައުލީމުގެ ދާއިރާއިން ރާއްޖެއަށް އެއްބާރުލުން ދިނުމަށް ދެ ބޭފުޅުންވެސް ވަނީ މަޝްވަރާ ކުރައްވާފައެވެ.
މިއަދު ސޮއި ކުރި އެއްބަސްވުމުގެ ދަށުން ތުރުކީ ވިލާތަށް އެކްސްޕޯޓު ކުރާ މަހުގެ ބާވަތްތަކަށް ލުއިތަށް ހޯދާ ދިނުމުގެ އިތުރުން ވިޔަފާރީގެ ހުރަސްތައް ކުޑަކޮށް ދެ ގައުމުގެ ދެމެދުގައި ވިޔަފާރީގެ ގުޅުން ވަރުގަދަ ކުރުމާއި، ރާއްޖެ އާއި ތުރުކީއާއި ދެމެދު ކުރާ ވިޔަފާރި އިތުރުކުރުން ހިމެނެއެވެ.
އަދި ހަމައެހެންމެ ރާއްޖެއިން މަސް އެކްސްޕޯޓް ކުރާ ފަރާތްތަކަށް ތުރުކީގެ މާކެޓުގައި ވިޔަފާރި ފުޅާ ކުރުމުގެ ފުރުސަތު ފަހި ކޮށްދިނުމުގެ އިތުރުން ދިވެހި ރައްޔިތުންނާއި ވިޔަފާރިތަކަށް ތުރުކީގެ އުފެއްދުންތައް ހެޔޮ އަގުގައި ލިބޭނެ ފުރުސަތުތަށް މަގު ފަހުކޮށްދިނުން ހިމެނެއެވެ.
ރާއްޖެއާއި ތުރުކީ އާ ދެމެދު އިގްތިސާދީ ގޮތުން ގާތް ގުޅުމެއް ގާއިމް ކުރަމުންދާއ މި ދަނޑިވަޅުގައި މި އެއްބަސްވުމުގެ ސަބަބުން އެ ގުޅުން އިތުރަށް ހަރުދަނާވެ ކުރިއަށް އޮތް ތަނުގައި ވިޔަފާރި އަދި އިގްތިސާދީ ދާއިރާއިން މަސައްކަތް އިތުރުކޮށް ވިޔަފާރިތަކަށް އިތުރު ފުރުސަތުތައް ފަހިވެގެންދާނެ ކަމަށް އިކޮނިމިކް މިނިސްޓްރީން ބުނެއެވެ.
މި އެއްބަސްވުމުގައި ސަރުކާރުގެ ފަރާތުން ސޮއި ކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ. އަދި އެ ގައުމުގެ ފަރާތުން ސޮއި ކުރެއްވީ ޓްރޭޑް މިނިސްޓަރު، ޕްރޮފެސަރު ޑރ. އޯމާ ބޮލަޓް އެވެ.
