ނަސްރުގެ ދުވަހުން ދަސް ކުރަންވީ އަމިއްލަ ސަލާމަތާއި ރައްކާތެރިކަމަށްޓަކައި އީމާންތެރިކަން ވަރުގަދަ ކުރުމަށާއި ސިޔާސީ ކަންކަމަށް ވުރެ ގައުމީ އުސޫލު އިސްކުރުމަށް ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
ނޮވެމްބަރު 3 ފާހަގަ ކުރުމުގެ ގޮތުން މިރޭ ބޭއްވި ހާއްސަ ރަސްމިއްޔާތުގައި އެ ދުވަސްވަރުގެ ރާއްޖޭގެ ވެރިއަކަށް ހުންނެވި ރައީސް މައުމޫން ވާހަކަފުޅު ދައްކަވަމުން ވަނީ އެ ދުވަހުގެ ހަނދާންތައް ހިއްސާ ކުރައްވާފައެވެ. އަދި އެ ދުވަހުން ދަސްކޮށްދޭ ފިލާވަޅުތައް ވަރަށް ގިނަ ކަމަށާއި އިބްރަތްތައް ވަރަށް ވެސް މުއްސަނދި ކަމަށް ވިދާޅުވިއެވެ. އެ ދުވަހުގެ އިބްރަތްތަކަށް ބަލާއިރު އަމިއްލަ ސަލާމަތާއި ރައްކާތެރިކަމަށް އީމާންތެރިކަން ވަރުގަދަ ކުރަން ޖެހޭ ކަމަށާއި އެ ދުވަހު ދިވެހިންނަށް ނަސްރު ލިބިގެން ދިޔައީ މާތް ﷲ މިންވަރުފުޅުން ކަމަށް މައުމޫން ވިދާޅުވިއެވެ.
އެ ދުވަހު ލިބުނު އެންމެ ބޮޑު އެއް ފިލާވަޅުގެ ތެރެއިން ދިވެހި ރައްޔިތުންގެ އެއްބައިވަންތަކަން މައުމޫން ފާހަގަ ކުރެއްވިއެވެ. ނުގުޑާ ފަދަ އަޒުމަކާ އެކުގައި އެއްބައިވަންތަކަން ހިފެހެއްޓުމުގެ މުހިއްމު ކަމުގެ މައްޗަށް އަލިއަޅުއްވާލައްވަމުން މައުމޫން ވިދާޅުވީ، ދުނިޔޭގެ ކަންތައްތައް ބަދަލުވަމުން އައި ގޮތުން ރާއްޖޭގެ ސިޔާސީ މަސްރަހަށާއި ޒަމާނާ އެއްގޮތަށް އަންނަމުންދާ ބަދަލުތަކާއި ގާނޫނުތަކަށް އަންނަމުން ދިޔަ ބަދަލުތަކާ އެކުގައި ވެސް ގައުމީ ވަހްދަތަށް އެއްވެސް އުނިކަމެއް އައިސްގެން ނުވާނެ ކަމަށެވެ. ގައުމީ އުސޫލުތަކަކީ ސިޔާސީ ކަންކަމަށް ވުރެ ވެސް ބޮޑަށް އިސްކަން ދޭންޖެހޭނެ އުސޫލުތަކެއް ކަމުގައި މައުމޫން ފާހަގަ ކުރެއްވިއެވެ.
ނޮވެމްބަރު 3 ގައި ފެނިގެން ދިޔައީ ދިވެހިންގެ ވަރުގަދަ އެއްބައިވަންތަކަމުގެ މަންޒަރުތައް ކަމަށް މައުމޫން ވިދާޅުވިއެވެ. ސަރުކާރާ މެދު ހިތްހަމަ ނުޖެހިފައި ތިބި މަދު ބަޔަކު ތިބި ކަމުގައި ވީ ނަމަވެސް އެ ދުވަހު އެންމެން ވެސް ތިބީ ސަރުކާރާ އެކީގައި ކަމަށާއި އެދުވަހު ހަމަލާ ދެމުން ދިޔަ އެއްވެސް ދުޝްމަނަކަށް ދިވެއްސެއްގެ ފަރާތުން އެއްވެސް އެހީތެރިކަމެއް ނުލިބޭ ކަން ރައީސް މައުމޫން ފާހަގަ ކުރެއްވިއެވެ.
ހަމައެއާއެކު އެ ދުވަހު ދިވެހިންގެ ވަރުގަދަ ހިތްވަރު ފެނިގެން ދިޔަ ކަމަށާއި ގައުމުގެ މިނިވަން ކަމަށްޓަކައި އަދި ގައުމުގެ އިއްޒަތާއި ޝަރަފަށްޓަކައި ތިމާގެ ހަށިގަނޑާއި ފުރާނައިން ގުރުބާންވާން ކެރުމަކީ ދިވެހިންގެ ތެރޭގައި ވަރަށް ފުނަށް ބިންވަޅުނެގިފައިވާ ހަގީގަތެއް ކަން ސާބިތުވި ކަމަށް މައުމޫން ވިދާޅުވިއެވެ. ދިވެހި ގައުމަކީ ހަނގުރާމައަކަށް ތައްޔާރުވެފައިވާ ގައުމަކަށް ނުވެ، މާ ބާރުގަދަ ހަތިޔާރުތަކެއް ނެތި ވެސް ދިވެހިން އެ ދުވަހު ހަނގުރާމަ ކުރަމުން ދިޔައީ ވަރަށް ގަދަ ހިތްވަރަކާ އެކުގައި ކަމަށް މައުމޫން ވިދާޅުވިއެވެ.
ނޮވެމްބަރު 3 ގައި ދިން އުދުވާނީ ހަމާލާއާއެކު ރާއްޖެއަށް އެހީތެރިކަން ފޯރުކޮށްދިން ގައުމުތަކާއި ބައިންލައަގްވާމީ ޖަމާއަތްތަކަށް ދިވެހިންގެ ހިތުގައި އޮތް އިހްލާސްތެރި ޝުކުރު ދެގޮތެއްނުވެ ދެމެހެއްޓުމަކީ ކުރަންޖެހޭނެ ކަމެއް ކަމަށް މައުމޫން ވިދާޅުވިއެވެ. އެގޮތުން އެ ދުވަހު އެންމެ ފުރަތަމަ އަމަލީ ގޮތުން އެހީތެރިކަން ފޯރުކޮށްދިން އިންޑިއާގެ އެކުވެރި ސަރުކާރަށާއި، އިންޑިއާގެ ސިފައިންނަށް ހިފެހެއްޓުމެއް ނެތް ޝުކުރު އަބަދުވެސް އޮންނާނެ ކަމަށް މައުމޫން ވިދާޅުވިއެވެ.
އެ ދުވަހު ރާއްޖެއަށް އިންޑިއާގެ ސިފައިންގެ ތެރެއިން އެންމެ އިސްކޮށް ހަރަކާތްތެރިވި އެއް އޮފިސަރާ މިއަދު އެމަނިކުފާނު ގުޅުއްވައި ވާހަކަ ދެއްކެވި ކަމަށް ވިދާޅުވިއެވެ. އެ ފޯން ކޯލުގަައި އެ އޮފިސަރު ވަނީ އެ ދުވަހު އިންޑިއާ ސިފައިންނަށް ދިވެހިން ބެހެއްޓީ މެހެމާންދާރީ އާއި އޯގާތެރިކަން ހަނދާން ހުންނަ ކަން ފާހަގަ ކުރެއްވި ކަމަށް މައުމޫން ވިދާޅުވިއެވެ. އަދި އިންޑިއާ ސިފައިންނަށް މިއަދުވެސް ދިވެހިން ބަހައްޓާ ގާތްކަމާ ރަހްމަތްތެރިކަން ފާހަގަ ކުރައްވާ ޝުކުރު އަދާ ކުރެއްވި ކަމަށް މައުމޫން ވިދާޅުވިއެވެ.
އިންޑިއާގެ އިތުރުން އެ ދުވަސްވަރު އެހީތެރިކަން ފޯރުކޮށް ދިން އދ އާއި ކޮމަންވެލްތްގެ އަގުވަޒަން ކުރަން ޖެހޭނެ ކަމަށް މައުމޫން ވިދާޅުވިއެވެ.
