ދެގައުމުގެ މަސްލަހަތު ހިމެނޭ ކަންކަމާ ގުޅޭ ގޮތުން މެޑަމް ސާޖިދާ މުހައްމަދު ގެމްބިއާގެ ފަސްޓް ލޭޑީ ފަޓޮމަޓާ ބަ ބަރޯއާ މަޝްވަރާކުރައްވައިފިއެވެ.
މިކަމާ ގުޅޭ ގޮތުން މަޝްވަރާކުރައްވާފައިވަނީ 'މޭކް ފައުންޑޭޝަން އެފްރިކާ އޭޝިއާ ލޫމިނަރީ ކޮންފެރެންސް" ގެ 11 ވަނަ އަހަރީ ބައްދަލުވުމުގެ ހަވާސާގައެވެ.
ދެ ބޭފުޅުންގެ މި ބައްދަލުވުމުގައި ދެ ގައުމުގެ ދެމެދުގައި ގާތް ގުޅުންތައް އުފައްދައި، އާންމުން ބޭނުންވާ މުހިންމު ކަންކަމުގައި ހުރި ހުރަސްތައް ނައްތާލަން ސަމާލުކަން ދިނުން ފަދަ ކަންކަމަށް ވަނީ މަޝްވަރާކުރައްވާފައެވެ. އަދި މޭކް ފައުންޑޭޝަނުން އިސްނަގައިގެން ކުރަމުންދާ މަސައްކަތްތަކާއި ބެހޭގޮތުންވެސް ވަނީ މަޝްވަރާކުރައްވާފައެވެ.
މީގެއިތުރުން އޭޝިއާ އަދި އެފްރިކާގެ މުޖުތަމައުތަކަށް ދިމާވެފައިވާ ގޮންޖެހުންތައް ހައްލުކުރުމަށް އެ ފައުންޑޭޝަނާ ގުޅިގެން ކުރަމުންދާ މަސައްކަތްތައް އިތުރަށް ހަރުދަނާކުރެއްވުމަށްވެސް ދެ ބޭފުޅުން ވަނީ މަޝްވަރާކުރައްވާފައެވެ.
'މޭކް ފައުންޑޭޝަން އެފްރިކާ އޭޝިއާ ލޫމިނަރީ" ގެ 11 ވަނަ އަހަރީ ކޮންފަރެސްގައި ބައިވެރިވެވަޑައިގަތުމަށް މެޑަމް ސާޖިދާ ޓެންޒޭނިއާއަށް ފުރާވަޑައިގެންފައިވަނީ މި މަހުގެ 28 ވަނަ ދުވަހުއެވެ. މެޑަމް ސާޖިދާ ޓެންޒޭނިއާގެ ޖޫލިއަސް ނިއެރެރޭ އިންޓަނޭޝަނަލް އެއާޕޯޓަށް ވަޑައިގަތުމާއެކު އެކަމަނާއަށް އެގައުމުގެ ކޮމިއުނިޓީ ޑިވެލޮޕްމެންޓު މިނިސްޓަރު ރިޒިކީ ޖުމާ ވަނީ މަރުހަބާ ވިދާޅުވެފައެވެ.
މި ކޮންފަރެންސްގެ ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެންނެވުމަށް ހަމަޖެހިފައިވަނީވެސް މެޑަމް ސާޖިދާއެވެ.
އޮކްޓޯބަރު 29 އިން 30 އަށް ކުރިއަށްދާ މި ކޮންފަރެންސްގެ 11 ވަނަ ބައްދަލުވުމުގައި އަންހެނުން ބާރުވެރިކުރުވުމާއި ބަލިތައް މެނޭޖުކުރުމާއި އެފްރިކާ އާއި އޭޝިއާގެ އެކި ކަންކޮޅުތަކުގައި ފެންވަރު ރަނގަޅު ސިއްހީ ހިދުމަތްތައް ފުޅާކުރުން ފަދަ މައުޟޫތަކާަ ގުޅޭ މުހިންމު މަޝްވަރާތައް ކުރުމަށް ހަމަޖެހިފައިވާކަމަށް ރައީސްއޮފީހުން ވަނީ ބުނެފައެވެ.
މި ބައްދަލުވުމަކީ ސިއްހީ ދާއިރާގެ ފަންނީ ބޭފުޅުންނާއި ސިޔާސަތު ކަނޑައަޅާ ފަރާތްތަކާއި އިލްމުވެރިން އެއްތަނަކަށް އެއްވެ މަޝްވަރާ ކުރައްވާ ބައްދަލުވުމެކެވެ.
