ނިމިދިޔަ ސަރުކާރުގައި މިފްކޯ އަށް ސަބްސިޑީގެ ގޮތުގައި ފަސް ބިލިއަނެއްހާ ރުފިޔާ ހޭދަކުރުމުގެ ސަބަބުން މަސްވެރިކަމުގެ ސިނާއަތުގެ ތަރައްގީ އަށް އެއްވެސް ކަމެއް ނުކޮށް ހުންނަން ޖެހިފައިވާ ކަމަށް، ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބުދެއްވަމުން ޝިޔާމް ވިދާޅުވީ، މަހުގެ އަގު ކަނޑައެޅެން ޖެހޭނީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލާ ގުޅިގެން ކަމަށާއި، އެހެން ނޫން ނަމަ ދެމެހެއްޓެނިވި ގޮތެއްގައި މަސްވެރިކަމުގެ ސިނާއަތް ރާއްޖޭގައި ކުރިނާރާނެ ކަމަށެވެ.
ޝިޔާމް ވިދާޅުވީ، މި ސަރުކާރުން މަހުގެ އަގު ތިރިނުކުރި ނަމަ، ސަރުކާރު އޮންނަން ޖެހޭނީ މިފްކޯ ހިންގުމަށްޓަކައި ހުރިހާ ޓެކްސް ފައިސާއެއް ހަރަދުކޮށްގެން ކަމަށެވެ. ޝިޔާމް ވިދާޅުވީ މިފްކޯ އަށް ބޭނުންވާ އަގެއްގައި މަސްކިރުމަށް މިދިޔަ ސަރުކާރުން ފަސް ބިލިއަނެއްހާ ރުފިޔާ ސަބްސިޑީގެ ގޮތުގައި ހޭދަކުރުމުގެ ސަބަބުން މަސްވެރިކަމުގެ ސިނާއަތުގެ ތަރައްގީއަށް އެއްވެސް ކަމެއް ނުކޮށް ސަރުކާރުން ހުންނަން ޖެހިފައިވާ ކަމަށެވެ.
ހަމަ އެއާއެކު ޝިޔާމް ވަނީ، މަސް ކިރާތާ 48 ގަޑިއިރުތެރޭ ސަރުކާރުން މަސްވެރިންނަށް ފައިސާ ދިނުމަށް ސަރުކާރުން ވެފައިވާ ވައުދު ތަކުރާރުކުރައްވައި، މިދިޔަ ސަރުކާރުން މަހުގެ އަގު 17 ރުފިޔާއިން 25 ރުފިޔާއަށް ބޮޑުކުރީ އެއްވެސް ދިރާސާއެއް ކުރުމެއް ނެތި ކަމަށް ވިދާޅުވާ ވިދާޅުވުން ތަކުރާރުކުރައްވައިފައެވެ.
އޭނާ އިތުރަށް ވިދާޅުވީ، މަހުގެ އަގަށް ބަދަލު ގެނައުމަށް ރައީސް ޑރ. މުހައްމަދު މުއިއްޒު ނިންމެވީ ރަނގަޅު ނިޔަތެއްގައި ކަމަށެވެ.
