މަސްވެރިކަމުގެ ސިނާއަތުގައި އެންމެ ބޮޑު އެއް ގޮންޖެހުމަކީ ކެޕޭސިޓީ ނެތުމާއި ވަސީލަތްތައް ތަރައްގީނުވެ އޮތުން ކަމަށް، ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
މަރަދޫ ދާއިރާގެ މެންބަރު އަހްމަދު ދީދީގެ ސުވާލަށް ޖަވާބުދެއްވަމުން ރައްޔިތުންގެ މަޖިލީހުގެ މިއަދުގެ ޖަލްސާގައި ޝިޔާމް ވިދާޅުވީ، މަސް ރައްކާކުރުމާއި އަގު އެއްކުރުމުގެ ކެޕޭސިޓީ ނެތި ގިނަ ދުވަސް ވޭތުވެގެން ހިނގައްޖެ ކަމަށާއި، ސަރުކާރު މަސް ކުންފުނި މިފްކޯ އަށް 28 އަހަރު ވީ އިރު ވެސް މަސްވެރިކަމުގެ ވަސީލަތްތައް ފުރިހަމައަށް ތަރައްގީނުވާ ކަމަށެވެ.
މިއީ މަސްވެރިކަމުގެ ސިނާއަތުގައި ހުރި ގޮންޖެހުންތަކުގެ ގޮތުގައި ޝިޔާމް ފާހަގަކުރެއްވިއެވެ.
ޝިޔާމް ވިދާޅުވީ، މިދިޔަ ސަރުކާރުން އައްޑޫ ހުޅުދޫގެ ފިޝަރީޒް ކޮމްޕްލެކްސްގެ ކެޕޭސިޓީ އިތުރުކުރުމުގެ ވާހަކަ 2019 އިން ފެށިގެން އެކިފަހަރު މަތިން ދެކެވުނު ކަމަށާއި އެކަމަކު އެއަށް އަމަލީ ސިފައެއް ނާންނަ ކަމަށެވެ. އެ މަސައްކަތުގެ އެންމެ ފަހުގެ އަޕްޑޭޓް ދެއްވަމުން ޝިޔާމް ވިދާޅުވީ، މި ސަރުކާރުން އެ ތަނުގެ ކެޕޭސިޓީ ބޮޑުކުރުމުގެ މަސައްކަތް ފަށާފައިވާ ކަމަށާއި، އެގޮތުން އެ މަސައްކަތަށް ފައިސާ ވެސް ހަމަޖެހިފައިވާ ކަމަށެވެ.
"އޭގެ ނަތީޖާއަކަށް ވެގެން ދިޔައީ އައިއެސްޑީބީގެ ފަރާތުން މިފްކޯގެ ތަރައްގީއަށް ކުރަން ހުރި މަސައްކަތުގެ ތެރެއިން އައްޑޫގެ ފިޝަރީޒް ކޮމްޕްލެކްސް ހިމެނޭގޮތަށް މި މަސައްކަތް ކުރެވޭނެ ފައިސާ ހަމަޖެހިގެން މި ދިޔައީ މިދިޔަ ހަފްތާގަ،" އޭނާ ވިދާޅުވިއެވެ.
އެ ތަނުގެ މަސައްކަތް އަންނަ އަހަރު ފަށައި، 2026 ގެ ކުރީކޮޅަށް ނިންމާލެވޭ ވަރު ވާނެ ކަމަށް ޝިޔާމް ވިދާޅުވިއެވެ. އޭރުން އައްޑޫގެ ފިޝަރީޒް ކޮމްޕްލެކްސްގައި މަސް ރައްކާކުރުމުގެ ކެޕޭސިޓީ 1500 ޓަނުން 2500 ޓަނަށް އިތުރުވެ، ބްރައިން ފްރީޒިން ކެޕޭސިޓީ 50 ޓަނުން 100 ޓަނަށް އިތުރުވެގެން ދާނެ ކަމަށް އޭނާ ވިދާޅުވިއެވެ.
