ދައުލަތުގެ ބާރުތަކަށް ނުފޫޒެއް ނުފޯރުވާނެ ކަމަށާއި، ނަމަވެސް އަދުލު އިންސާފު ގާއިމުކުރަން ކުރައްވަން ޖެހިވަޑައިގެންނެވި ކަމެއް ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ދައުލަތުގެ ބާރުތަކާއި، މިނިވަން މުއައްސަސާއަތައް އަދި އިންތިހާބުކުރެވޭ ބަޔަކަށް އެމަނިކުފާނު މިހާތަނަށް ވެސް ނުފޫޒު ނުފޯރުވާ ކަމަށާއި ކުރިއަށް އޮތްތަނުގައި ވެސް ނުފޯރުވާނެ ކަމަށެވެ.
ދައުލަތުގެ ބާރުތަކަށާއި މިނިވަން މުއައްސަސާތަކަށް އަދި އިންތިހާބުކުރާ މަގާމުތަކަށް ނުފޫޒު ނުފޯރުވާނެ ކަމުގެ ޔަގީންކަން ރައީސް ދެއްވީ ދެ މިނިވަން މުއައްސަސާ ކަމަށްވާ އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ) ގެ ވެރިން އައްޔަންކުރުމުގެ ބާރު ރައީސަށް ލިބިދޭ ގޮތަށް އޮކްޓޫބަރު 27 ވަނަ ދުވަހު ސަރުކާރުގެ ފަރާތުން މަޖިލީހަށް ހުށަހެޅުމާ ގުޅިގެން ކުރިމަތިވި ފާޑުކިޔުންތަކަށް ރައްދު ދެއްވުމުގެ ގޮތުންނެވެ.
މިކަމާ ގުޅިގެން އޭސީސީ އާއި އިލެކްޝަންސް ކޮމިޝަންގެ ބާރު ކަނޑުވާލަން ރައީސް އުޅުއްވާ ކަމަށް ބުނެ އިދިކޮޅު ފަރާތްތަކުން ވަނީ ފާޑުކިޔުންތައް އަމާޒުކުރަމުންނެވެ. އެގޮތުން އިދިކޮޅު މައި ޕާޓީ އެމްޑީޕީ އިން ނެރުނު ނޫސްބަޔާނެއްގައި ބުނީ އެ ކޮމިޝަންތަކުގެ ރައީސް އަދި ނައިބު ރައީސުން އައްޔަނުގެ ކުރުމުގެ ބާރު ރައީސްއަށް ދިނުމަށް ގާނޫނަށް ހުށަހަޅާފައިވާ އިސްލާހަކީ، ގާނޫނުއަސާސީން އެކަށައަޅާފައިވާ ފާރަވެރިވުމުގެ ނިޒާމު ފުނޑާލައި، ބާރުތައް އެއްކޮށްލުމުގެ ސިލްސިލާގެ ތެރެއަށް އިތުރުވާ ބޮޅެއް ކަމަށާއި އެކަން ކުށްވެރި ކުރާ ކަމަށެވެ.
މިކަމާ ގުޅިގެން އީސީގެ ކުރީގެ ނައިބު ރައީސް އިސްމާއީލް ހަބީބް ވިދާޅުވީ މިނިވަން މުއައްސަސާތަކުން މިދިޔަ އަހަރު ރައީސަށާއި އެޓާނީ ޖެނެރަލްގެ އިތުރުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހުށަހެޅި ކަރުދާހެއްގައި، އީސީއާއި އޭސީސީގެ ރައީސާއި ނާއިބު ރައީސް އައްޔަން ކުރައްވާނީ ރައީސް ކަމަށް ކަނޑައެޅުމަށް ހިމަނައިފައިވާ ކަމަށެވެ.
އޭސީސީއާއި އީސީގެ ރައީސާއި ނައިބު ރައީސް އައްޔަންކުރުމުގެ ބާރު ރައީސަށް ދޭ ގޮތަށް ގާނޫނަށް ބަދަލުގެންނަން މަޖިލީހަށް ހުށަހެޅި ބިލުގައި ވާގޮތުން އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރަން ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ. މި ނަން ފާސްކުރަން މަޖިލީހުގެ ޖަލްސާއެއް ބާއްވަން ޖެހެއެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެއެވެ.
