ރަސްމީ ދަތުރުފުޅެއްގައި ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ޓެންޒޭނިއާއަށް ވަޑައިގަތުމުން އެކަމަނާއަށް އެ ގައުމުން ހޫނު މަރުހަބާއެއް ކިޔައިފިއެވެ.
މެޑަމް ސާޖިދާ ޓެންޒޭނިއާގެ ޖޫލިއަސް ނިއެރެރޭ އިންޓަނޭޝަނަލް އެއާޕޯޓަށް ވަޑައިގަތުމާއެކު އެކަމަނާއަށް އެގައުމުގެ ކޮމިއުނިޓީ ޑިވެލޮޕްމެންޓު މިނިސްޓަރު ރިޒިކީ ޖުމާ ވަނީ މަރުހަބާ ވިދާޅުވެފައެވެ.
މެޑަމް ސާޖިދާގެ މި ދަތުރުފުޅަކީ 'މޭކް ފައުންޑޭޝަން އެފްރިކާ އޭޝިއާ ލޫމިނަރީ" ގެ 11 ވަނަ އަހަރީ ކޮންފަރެސްގައި ބައިވެރިވެވަޑައިގަންނަވަން ކުރައްވާ ދަތުރުފުޅެކެވެ. ރައީސް އޮފީހުން ބުނީ ފަސްޓް ލޭޑީންގެ ޕެނަލެއްގައި އަދި މޭކް ފައުންޑޭޝަންގެ ބައްދަލުވުމެއްގައި ވެސް މެޑަމް ސާޖިދާ ވާހަކަފުޅުދައްކަވާނެ ކަމަށެވެ.
މި ކޮންފެރެންސްގައި ބައިވެރިވެވަޑައިގަތުމަށް މެޑަމް ސާޖިދާ ފުރާ ވަޑައިގެންނެވީ ރޭގެ ވަގުތެއްގައެވެ. މި ކޮންފަރެންސްގެ ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެންނެވުމަށް ހަމަޖެހިފައިވަނީވެސް މެޑަމް ސާޖިދާއެވެ.
އޮކްޓޯބަރު 29 އިން 30 އަށް ކުރިއަށްދާ މި ކޮންފަރެންސްގެ 11 ވަނަ ބައްދަލުވުމުގައި އަންހެނުން ބާރުވެރިކުރުވުމާއި ބަލިތައް މެނޭޖުކުރުމާއި އެފްރިކާ އާއި އޭޝިއާގެ އެކި ކަންކޮޅުތަކުގައި ފެންވަރު ރަނގަޅު ސިއްހީ ހިދުމަތްތައް ފުޅާކުރުން ފަދަ މައުޟޫތަކާަ ގުޅޭ މުހިންމު މަޝްވަރާތައް ކުރުމަށް ހަމަޖެހިފައިވާކަމަށް ރައީސްއޮފީހުން ވަނީ ބުނެފައެވެ.
މި ބައްދަލުވުމަކީ ސިއްހީ ދާއިރާގެ ފަންނީ ބޭފުޅުންނާއި ސިޔާސަތު ކަނޑައަޅާ ފަރާތްތަކާއި އިލްމުވެރިން އެއްތަނަކަށް އެއްވެ މަޝްވަރާ ކުރައްވާ ބައްދަލުވުމެކެވެ.
